青少年

  「少年」跳轉到呢度。想搵港產片，請睇「少年 (電影)」。

  「𡃁妹」跳轉到呢度。想搵外號「𡃁妹」嘅香港女藝人，請睇「李綺雯」。

一羣青少年男女

青少年係指介乎細路同大人之間嘅年輕人，參考世界衞生組織嘅定義，青少年嘅年齡介乎10至19歲之間。呢段時期經歷青春期同性成熟，啲人叫佢哋後生仔、後生女或者𡃁仔，同衣物尺碼有關嗰時叫中童，學術啲就叫青少年。

後生唔一定指年紀，有時都講心態，會講成係有衝動去實現一啲嘢，鍾意幻想，想做就做多過前思後想，鍾意冒險多過舒舒服服。

粵語俗稱

粵語入面，𡃁（粵拼：leng1），或者叫𡃁仔、𡃁妹，係對十幾歲青少年人嘅俗稱，過咗童年，但又未成年，身體發育重未結束。有指「𡃁」本字係「僆」或者「𨈓」，原本解孖生仔。

亦有同「𡃁」有關嘅用詞，譬如𡃁模、𡃁妹樣。

睇埋

• 老年