2005年高雄標童命案

2005年高雄標童命案係一單發生喺臺灣高雄市鼓山區，一家人因為集體精神妄想，幻想自己神明附身，導致一家人自殘、互毆嘅死亡案件。

受害家庭背景

吳姓一家六口（爸爸：吳武運、阿媽吳蔡月卿、胞弟吳旺元、長女吳金女、胞妹吳美紅、么女吳美宜）住喺鼓山一個社區，父母做小工為生，四名子女當時大約二十幾歲，分別從事護士、餐廳同埋印刷工作。

事件經過

細妹首先被附身

最細嘅妹妹今年二月底突然起乩，聲稱被三太子附身，同屋企人講，喺台北嘅大家姐會有生命危險，一定要返高雄，否則會有生命危險。老媽媽連夜將大女帶返屋企，但大女吳金女返到屋企訓覺嘅時候，就夢見自己被性侵犯，嚇到淨係敢喺日頭訓覺。

全家人被上身、互餵食屎抹尿

屋企人之後諗起，大女喺三月頭有一次聽完一個電話之後就被神明上身，自稱係觀世音菩薩，跟住就徒手毆打自己自殘。家人情急之下，陪佢去五指山禪修，又去到楠梓區一家神壇收驚，但返屋企之後情況反而惡化，屋企人被神明上身，老豆自認被玉皇大帝上身、阿媽係王母娘娘、細妹係七仙女等，自殘互毆。

情形持續一個月，一家六口分別攞神主牌、枴杖互毆，甚至攞點燃嘅香燒焫對方，相信互撒鹽米、灌對方食屎、向對方抹尿液就可以驅魔，多日嚟只係飲符水維生，又唔覺得肚子餓，住在樓下嘅親戚，都嚇到唔敢返屋企，只得暫時棲身旅館。

一家無法正常工作，4月4號吳金女同屋企人前往姑姑屋企收驚，行經高雄市楠梓區一戶民宅，但就向對方惡意吐口水，經對方報警，被警方當成精神病患送回裕民街住處。

大女死亡、警察介入

4月9號，大女冇咗氣息，但全家認為死嘅唔係大女，而是附身嘅妖魔。直到第二天上身嘅情形消失，佢地先將大女兒送往高雄醫學大學附設醫院急救，一家五人認為屋企有邪靈，擔心再被附身，全部喺外地匿埋，就算接獲警方通知要求到案說明，法醫驗埋屍，證實大女孩因為多日無食嘢，導致體內器官多重衰竭而死，並唔係因為中邪，屋企人都認為大女無死，直到阿媽被大女附身，話畀屋企人聽死訊，佢地先至接受事實。

警方當時偵辦亦覺得離奇，佢哋屋企當時各個窗口貼滿符咒，窗口曬著一排全部都係黑色嘅衣物。之後，檢警也建議死者家屬接受精神鑑定。吳武運自稱當時全家人精神恍惚，知道吳金女出問題，但覺得嗰個唔係佢個女，所以無送醫。不過，醫學鑑定佢哋無精神病，檢方認為5人精神正常，但未及時施救，因此依遺棄致死罪起訴佢哋。

後來，鄰居有幫忙募款請法師驅邪、超渡，吳家人先恢復正常生活，但大家都唔願意再提起呢段往事。去到2007年4月，《自由時報》嘅記者嘗試訪問佢哋，但吳武運就話自己無罪，拒絕訪問。

對命案嘅評論

• 國軍高雄總醫院精神科主任曾冬勝接受訪問嘅時候話，佢哋應該係患上家庭集體精神妄想症，而精神妄想症係精神科疾病入面就醫率最低嘅一群，因為佢地跟本唔覺得自己有病，一發作嘅話情況亦相當嚴重。就算有輕微情況，亦可能因為無影響社交同人際關係，所以無被鄰居或是同事發現，而家人彼此之間依然靠著緊密嘅宗教信仰聯繫著，唔會覺得有問題，更加唔會去求醫。曾冬勝又話，呢家人當中係護士，都堅信呢種情況唔係病，而是被妖魔鬼怪附身，反映佢哋長期以來有著根深柢固嘅錯誤觀念。
• 高雄市道教會理事長柯天爽強調三太子屬於「正神」，唔可能隨便附身，吳家人自稱三太子附身，令他相當質疑；而且所有宗教都勸人做善事，唔會見死不救。
• 2021年9月，安幼琪喺壹電視節目《突發琪想》入面，亦再次探討呢次命案。台灣媒體人丁學偉以玄學角度分析，話房子疑似係路沖，再加上整塊地不規則形，喺民間傳說入面係招惹鬼怪嘅凶屋，而呢家人係某次移動屋企入面一啲嘅三太子神像過程入面，遭到邪靈入侵，結果令呢個地方變成聚陰嘅宅地，進而遭邪靈騷擾。

文化影響

• 2022年，台灣牽猴子股份有限公司發行嘅電影《咒》，正係改編自呢單命案。