2006年下塘西路車禍

2006年下塘西路車禍喺3月16號發生。當日晏晝4點，1部泥頭車喺廣州下塘西路高架橋迎面撞咗864路巴士，泥頭車運嘅泥沙湧落車廂砸住D人，造成6人死亡，20人受傷。

2006年3月16號晏晝4點鬆D，一部從倚綠山庄開往海聯路嘅864路巴士（型號：廣州牌GZK6101，編號XS-263），途經下塘西路高架橋北往南路段。同時，一部广州安迅达散体物料运输公司屬下嘅泥頭車，從高架橋南往北方向上橋，去到下塘西路同政民路交界高架橋轉彎位嗰陣，失控越過雙黃實線翻車，車身啱好砸住路過嘅864路巴士。泥頭車裝住嘅泥沙湧落巴士車廂。車禍造成巴士乘客5男1女死亡，20人受傷。

當時，巴士畀泥頭車推到高架橋個邊，令車廂右邊D車門開唔到。部分郁得嘅傷者自己從車身右邊窗口經高架橋花壇離開車廂，而部分困喺車上嘅乘客要等消防員用電鋸鋸開車身同用鐵鏟鏟走泥沙先救得出。