跳去內容

西敏襲擊案

出自維基百科，自由嘅百科全書
(由2017年西敏襲擊案跳轉過嚟)
  呢篇文章講嘅係2017年嘅兇案。想搵1605年意圖炸咗西敏宮嗰單案，請睇「火藥陰謀」。
兇徒行徑圖
肇事地方，倫敦西敏橋一帶

西敏襲擊案 (Westminster attack)，又叫西敏宮恐怖襲擊 (Westminster terrorist attack)，係指2017年3月22號喺英國倫敦西敏市西敏宮（國會大樓）對出發生嘅恐怖襲擊，襲擊範圍包括西敏宮、西敏橋、同埋國會廣場。死咗五個人，包括兇徒同埋一個警察；傷者人數約50人。

經過

[編輯]

2017年3月22號下晝大約兩點八個字，一架現代牌彎仔喺西敏橋撞冧咗大概十個人，途中有人由橋面跌落泰晤士河[1]。架車跟住撞向圍欄，然後有個黑衣人由架車道走出嚟，跑入西敏宮範圍，用刀捅冧一個警察。兩個便衣警察趕到，警告黑衣人。佢唔聽，警察就射咗佢四槍隊冧佢[2][3]。

國會議員 Tobias Ellwood 咁啱路過，嘗試心肺復甦遇襲警察，但係佢同埋後來到場嘅醫護人員合力都救唔返。Tobias Ellwood 同恐襲有啲淵源，佢阿哥 Jon 死喺2002年峇里島爆炸案[4]。

兇徒上身中槍，亦救唔返，當場死亡[5]。跌落河嗰個人後來救返，無死到[6]。傷者送晒去附近五間醫院[7]。

死傷者

[編輯]

總共五個人死咗，包括兇徒。兇徒同埋另外三個死者持英國國籍。另有大約50人受傷[8]。

死者當中有兩個人係被架車撞死，包括英籍教育工作者 Aysha Frade[9]同埋美籍遊客 Kurt Cochran[10]。第三個死者係便裝警 Keith Palmer，隸屬帝都警察廳嘅西敏宮分隊，遇襲時身上無帶武器[11][12]。最後一個遇害者係英籍抹窗技工 Leslie Rhodes，遇襲後死喺醫院[13][8]。

兇徒叫 Khalid Masood，襲擊當日52歲。佢喺根德郡出世、東修適士郡長大，原名 Adrian Russell Elms （跟生父姓）或者 Adrian Russell Ajao （跟後父姓）。佢皈信伊斯蘭教之後改名 Khalid Masood，曾經去過沙地阿拉伯教書同埋朝聖[14]。佢曾經犯事，英國軍情五處有懷疑過佢想搞恐襲，但查唔出嘢[15]。帝都警察廳發言人話，襲擊者對武裝聖戰有興趣，襲擊手法同伊斯蘭國相關嘅恐襲相似，但無證據顯示佢同伊斯蘭國或者阿蓋達有直接聯繫[16]。

應變

[編輯]

襲擊發生之後，西敏站臨時封閉，案發現場附近圍封方便警察做嘢[17]。國會大樓唔俾出入，保安指示入面嘅議員、職工、同埋人客留喺寫字樓或者議事廳，直至警方清完場。有啲人後來疏散咗去西敏寺[18]。

英國國會、威爾斯議會、同埋蘇格蘭議會喺襲擊發生之後中止當日議程，之後嗰日恢復運作[19][20]。

英國恐襲警報級別喺襲擊之前已經係「嚴重」，代表襲擊發生嘅機會好高。襲擊後，當局決定唔再提升警報級別[21]。

迴響

[編輯]

伊斯蘭國聲稱襲擊關佢哋事，話係報復英軍空襲伊斯蘭國據點[22]。專家分析，伊斯蘭國喉舌聲稱自己同一單恐怖襲擊有關之前，通常都會查下襲擊者同佢哋嘅人馬係咪真有聯繫，好少噏得就噏。不過，呢次公告無乜講過襲擊者嘅背景，所以相信伊斯蘭國相關人士嘅參與唔多[23]。

英國首相文翠珊開記者會，話：「國會聽日會照常開會，倫敦人聽日會照常生活。我哋唔會輸俾恐怖主義。」[24]

睇埋

[編輯]

參考

[編輯]
  1. ↑ "Woman filmed falling". BBC News. 22 March 2017. 喺23 March 2017搵到.
  2. ↑ "Reports of shots outside UK Parliament". BBC News. 喺22 March 2017搵到.
  3. ↑ "Parliament attack: man shot after police officer stabbed at House of Commons". The Guardian. 喺22 March 2017搵到.
  4. ↑ "Hero MP in Parliament terror attack: Tobias Ellwood battled to save life of stabbed officer". The Telegraph (英國英文). 喺22 March 2017搵到.
  5. ↑ Sparrow, Andrew. "Parliament attack: man shot after police officer stabbed at House of Commons". The Guardian. ISSN 0261-3077. 喺22 March 2017搵到.
  6. ↑ "Woman filmed falling". BBC News. 22 March 2017. 喺23 March 2017搵到.
  7. ↑ "Parliament shooting: Woman dies in Westminster attack". BBC News. 喺22 March 2017搵到.
  8. ↑ 8.0 8.1 "London attack: The victims". BBC. 2017-03-24. 喺2017-03-24搵到.
  9. ↑ Horton, Helena. "Aysha Frade: the first named civilian victim of Westminster attack 'was picking up her children from school'". The Daily Telegraph. 喺23 March 2017搵到.
  10. ↑ Horton, Helena. "Aysha Frade: the first named civilian victim of Westminster attack 'was picking up her children from school'". The Daily Telegraph. 喺23 March 2017搵到.
  11. ↑ "Keith Palmer named as officer killed in London terror attack". Metro. UK. 22 March 2016. 喺22 March 2017搵到.
  12. ↑ Batchelor, Tom (22 March 2017). "Keith Palmer: Policeman stabbed to death in London terror attack named". The Independent. 原著喺2020年11月13號歸檔. 喺22 March 2017搵到.
  13. ↑ "Civilian death toll climbs after London terror attack". CBS News. 2017-03-24. {{cite web}}: Cite has empty unknown parameter: |dead-url= (help)
  14. ↑ "London Attacker Khalid Masood Worked in Saudi Arabia Teaching English". Time. 原著喺2017年3月29號歸檔. 喺26 March 2017搵到.
  15. ↑ Griffin, Andrew (23 March 2017). "Khalid Masood: London attacker was known to MI5 but had no terror convictions". Independent. 喺23 March 2017搵到.
  16. ↑ "Westminster attacker Khalid Masood had interest in jihad, say police". The Guardian. 27 March 2017. Retrieved 28 March 2017.
  17. ↑ Jen Mills (2017-03-22). "Westminster Underground closed as 'terror attack' on Parliament leaves area on lockdown". 英國都市日報.
  18. ↑ "London attack - latest updates". BBC. 2017-03-22.
  19. ↑ Carrell, Severin. "Holyrood suspends referendum debate after Westminster attacks". The Guardian. 喺23 March 2017搵到.
  20. ↑ "Assembly suspended after London attack". BBC News. 喺23 March 2017搵到.
  21. ↑ "What is the latest UK terror threat level following London Parliament attack in Westminster?". The Sun (英國英文). 2017-03-23. 喺2017-03-23搵到.
  22. ↑ "Islamic State claims it was behind UK attack". Sky News. 喺23 March 2017搵到.
  23. ↑ Lizzie Dearden. "Isis claiming responsibility for London attack to mask huge losses in Iraq and Syria, say terror experts". The Independent. 喺23 March 2017搵到.
  24. ↑ "Parliament's Business as Usual Shows Defiance Post London Attack". Bloomberg. 2017-03-23. 喺2017-03-23搵到.
由「https://zh-yue.wikipedia.org/w/index.php?title=西敏襲擊案&oldid=1680693」收