2018年中華民國地方公職人員選舉

出自維基百科,自由嘅百科全書
Jump to navigation Jump to search
‹ 2014年 • Flag of the Republic of China.svg • 2022年
2018年11月24號
選舉類型
  • 直轄市長
  • 縣市長
  • 直轄市議員
  • 縣市議員
  • 鄉鎮市區長
  • 鄉鎮市區民代表
  • 村里長選舉
  • 公民投票
  • 選舉席次 11047
    蔡英文民主進步黨
    獲得直轄市長 2  50%
    獲得市長 2  33.3%
    獲得縣長 2  66.7%
    吳敦義中國國民黨
    獲得直轄市長 3  200%
    獲得市長 1  除以零%
    獲得縣長 11  120%


    2018年中華民國地方公職人員選舉,亦叫做2018年九合一選舉,喺2018年11月24號舉行,今次選舉喺中華民國嘅直轄市(6都)選出新一屆嘅直轄市長、直轄市議員、里長、山地原住民區長同區民代表;同時會選埋新一屆的縣市長、縣市議員、鄉鎮市長、鄉鎮市民代表、村長和里長。冚嘭唥加埋晒有11,047個位。而且今次重有10個公投項目會一齊表決,內容牽涉核電、性平權同東京奧運台灣正名等等。

    當選人會喺2018年12月25號就職。

    背景[編輯]

    呢次選舉係視為對總統蔡英文嘅一場信心投票。由於蔡英文執政兩年火頭四起,包括針對退休軍公教人士嘅年金改革、同性婚姻合法化、一例一休、畀中國外交孤立、國民黨黨產爭議呢啲大議題,整體政府民意比上任嗰陣低咗好多。對於政府嘅民望,喺今次選舉就會見真章。

    選舉焦點[編輯]

    台北市[編輯]

    上屆同民進黨聯手嘅柯文哲喺今屆冇咗綠營支持,民進黨另外派出立委姚文智應戰,加上國民黨嘅丁守中夾攻,令柯文哲嘅連任路腹背受敵。民調亦都顯示越近投票日,柯文哲同丁守中嘅距離越嚟越近[1],所以台北市競爭相當激烈。

    高雄市[編輯]

    綠營陣地高雄原本係民進黨守得好穩嘅地方,不過今屆國民黨韓國瑜引起風潮,民意調查同民進黨陳其邁越追越貼[2][3],後來重爬咗佢頭[4],依家兩個人鬥到難分難解。

    台中市[編輯]

    台中一向都係國民黨同民進黨嘅兵家必爭之地,上屆民進黨林佳龍贏咗。今次選戰嘅初期因為台中嘅東亞青年運動會主辦權突然被取消,呢個舉動被視為中國對台灣嘅外交打壓,當時林佳龍民望受惠呢件事遠遠領先盧秀燕,但係後來事件凋淡咗,盧秀燕民望慢慢追返上去。臨投票日之前嘅民意調查都顯示林、盧兩個人喺度拉鋸緊,好難知道最後會係邊個贏。

    結果[編輯]

    民進黨受「韓流」影響,縣市長選舉大敗,由13席跌到得6席。原先民意上好接近嘅高雄市同台中市,國民黨嘅韓國瑜盧秀燕居然大敗民進黨陳其邁林佳龍當選,民進黨連雲林、彰化呢啲選情比較樂觀嘅縣都輸埋。[5]

    國民黨就成為呢場選舉嘅大贏家,除咗攞到民進黨執政嘅7個縣市,重「收編」埋原本親藍嘅兩個獨立縣長個位,國民黨總共有成15個縣市長個位。

    而台北市方面,柯文哲同國民黨丁守中喺開票期間互有領先,到最後柯文哲只係贏丁守中約莫3000票,丁守中即刻申請重新點票,後來又改變主意,直頭去申請選舉無效,但係最後又返去重新點票。

    公投方面,親藍或者保守派提出嘅7項公投全數通過,包括反對日本核災區食物進口同支持台灣核電廠繼續運作。支持同性戀權益同埋要求以「台灣」身份參加東京奧運嘅3項議案就被否決。

    選後[編輯]

    選舉之後,韓國瑜就話認同九二共識,重話要成立兩岸工作小組[6]。台中嘅盧秀燕都有咁上下嘅構思。呢個舉動引發好多台灣人喺網絡上搜查「九二共識」同「移民」嘅字眼,當中以韓當選嘅高雄市搜尋次數最多。[7]呢件事被認為係民眾普遍唔清楚候選人嘅政治立場,到選完之後就開始後悔,就好似英國脫歐公投噉。

    睇埋[編輯]

    參考[編輯]