2021年中國大陸停電限電事件

出自維基百科,自由嘅百科全書
跳去導覽 跳去搵嘢

2021年中國大陸停電限電事件係指中華人民共和國自2021年8月底20個省市開始出現嘅電荒。自2021年9月24號開始,有省份出現大規模限電狀況[1],其中以中國東北遼寧吉林黑龍江三省情況最嚴峻,呢三個省多次出現拉閘限電現象[2],東北有啲城市一日之內冇預警多次停電,甚至一次停電超過12個鐘。瀋陽有啲地方嘅交通燈突然停電,引發交通擠塞。遼寧澎輝鑄業有限公司因為突發限電,導致通風系統停止運作,發生高爐煤氣中毒事故,23個人中毒送院[3]。遼寧為咗應對缺口而多次發佈缺電橙色同藍色預警信號。多地民生經濟受到影響同衝擊[4][5]

媒體推測限電同中國大陸中央政府嘅減碳轉型政策有關,部分省份為咗控制能耗同達到減排目標而對一啲高污染企業限電[6];同時中國大陸嘅武漢肺炎疫情緩解之後嘅用電量暴增同埋國內火力發電廠需要嘅煤礦價格飆升;[5]而供電價格受到國家限制亦係呢次中國大陸電荒嘅原因之一,喺煤礦漲價嘅情況下,發電廠發電越多就虧損越大,有啲發電廠被迫用各種理由減少發電[7]

由於煤電價格倒掛被認為係造成呢次電荒嘅原因之一,內蒙古寧夏上海等地區開始畀煤電市場交易電價(電網向發電企業買電嘅價格)上漲。9月29號,國家發改委、國家鐵路集團發布《關於做好發電供熱企業直保煤炭中長期合同全覆蓋鐵路運力保障有關工作嘅通知》,加大對發電供熱煤炭鐵路運輸嘅支持[8]

睇埋[編輯]

參考[編輯]

  1. "界面新聞". www.toutiao.com. 喺2021-09-27搵到.
  2. "遼寧發布缺電橙色預警 實施有序用電後仍存拉閘限電風險".
  3. "限電引發!遼寧一企業煤氣泄漏,23人中毒送醫!吉林一水務公司:涉停電停水通知措辭不當". 證券時報.
  4. "缺電四級藍色預警生效 全省工業有序用電".
  5. 5.0 5.1 "殺死那個東三省人?中國東北拉閘限電的「硬停電風暴」". 聯合報.
  6. "中國拉閘限電衝擊居民生活 背後三個原因". BBC.
  7. "中國"拉閘限電"愈演愈烈 工廠停產致經濟增長前景暗淡". 美國之音.
  8. ""漲電價"已開啟!內蒙古、上海、湖南允許"上網電價"上浮".