AVPU

AVPU，又叫清聲痛否、AVPU scale（alert, verbal, pain, unresponsive），係一種醫護人員、照顧者或者急救員量度同記錄患者清醒程度嘅系統^[1]，好多時係喺緊急情況，例如急救嗰陣用。

有另一套系統叫格拉斯哥昏迷指數，會評估患者嘅眼部活動、對聲音嘅反應、肢體動作技能，得出一個3-15之間嘅分數。AVPU系統係一個簡化，會循呢三方面得出患者最好嘅反應^[2]，得出A、V、P、U四個等級其中一個。

四個等級嘅意思

相對於格拉斯哥昏迷指數有13個分數嘅可能性，AVPU系統只有4個。評估人員應該由最好嘅狀態（A）檢查到最差嘅狀態（U），可以對明顯清醒嘅患者慳返唔使做咁多評估。四個可能出現嘅分數係^[2]：

清醒（Alert）：患者係醒嘅（可能有啲迷糊），會自發打開隻眼、對聲音有反應（未必可以清楚答到問題）、可以做到肢體動作。
對聲音有反應（Voice）：對評估人員對佢嘅問題能作出某啲反應，可以係口入邊嘰哩咕嚕發出唔清楚嘅聲、呻吟、肢體有輕微嘅郁動。
對疼有反應（Pain）：評估人員對患者進行痛刺激，可以係中心痛刺激（捏心口、膊頭）或者外圍痛刺激（捏手指嘅甲弧影），患者可以用眼球運動、聲音、肢體運動嘅方式回應。
無反應（Unresponsive）：有時又叫unconscious，係指患者對以上嘅測試全部都畀唔到反應。

喺急救嚟講，A以外嘅分數都代表患者需要一啲額外嘅照顧。喺醫院或者一啲長期嘅康復設施入邊，一啲患者嘅日常清醒程度可能喺A以下。^[3]

喺一啲緊急醫療服務入邊，清醒（A）可以再分4級，呢4級就係睇患者答唔答到某4條問題，例如係時間、人物、地點、事件。舉個例，一個患者如果可以完全答到「依家幾點」、「自己叫咩名」、「自己喺邊」同「依家發生咩事」嘅話，佢嘅清醒指數就係「alert and oriented x 4」。

急救人員可以做一個AVPU評估先，如果分數係低過A再做格拉斯哥昏迷指數測試。

AVPU系統唔適合用嚟對病人做長期嘅醫學觀察，呢種情況用格拉斯哥昏迷指數好啲。

AVPU系統可以以以下嘅方式同GCS（格拉斯哥昏迷指數）對應(Kelly, Upex and Bateman, 2004)^[1]：

AVPU亦都可以同PGCS（兒科格拉斯哥昏迷指數）對應^[4]：