Alliance Canada HK

出自維基百科,自由嘅百科全書
跳去導覽 跳去搵嘢

Alliance Canada HK(ACHK)係一個推動加拿大港人社群參與政治嘅全國性聯盟。

目的[編輯]

佢哋成立嘅目的,大多係同中國政府侵犯人權嘅問題有關,當中包括[1][2]

  • 透過引用外國腐敗官員受害者正義法(馬格尼茨基法案)向中共政權、香港政府同埋香港警務處有關官員,追究干犯人權同警暴責任,對呢啲官員實施制裁措施,包括封鎖同凍結相關人仕資產;
  • 為香港人、西藏人、維吾爾族人、中國人同埋其他因中共而需尋求庇護嘅人士提供人道主義支援;
  • 保障加拿大國民嘅基本自由,以及積極反制中共向加拿大傳播媒體,發報虛假資訊同埋政治干擾及操控;
  • 調查同反制中國政府對加拿大公共同私人機構所作出嘅干預。推動同埋訂立外國代理人登記冊,外國影響力透明化法案;制止所有透過中國政府、中國學生學者聯合會、孔子學院同埋中共統戰部所作出嘅一切政治、文化、外遊開支、私人餽贈同埋私人活動上嘅資助;
  • 停止向中國出口所有用喺侵犯人權嘅軍事/警察嘅產品同科技。

事件[編輯]

共同創辦人疑被中國政府恐嚇[編輯]

加拿大媒體《Global News》同香港《立場新聞》喺2021年4月報導,組織共同創辦人王卓妍喺2020年1月準備ACHK嘅時候,佢入住一間酒店,期間收到一個恐嚇電話,當中準確咁講咗佢個名同房間號碼。佢向警察求助,但警察就話呢啲行為多少係喺法律灰色地帶,政府可以做到嘅嘢唔多。而《Global News》就形容,呢件事係眾多中國相關人權運動者被恐嚇嘅例子之一[2]

參考[編輯]

  1. "加拿大版五大訴求". Alliance Canada Hong Kong (中文). 喺2021-04-04搵到.
  2. 2.0 2.1 "為香港人權狀況發聲 加拿大港人組織創辦人收威脅電話 「我們來捉你了」 | 立場報道 | 立場新聞". 立場新聞 Stand News (英文). 喺2021-04-04搵到.