Alliance Canada HK

Alliance Canada HK（ACHK）係一個推動加拿大港人社群參與政治嘅全國性聯盟。

目的

佢哋成立嘅目的，大多係同中國政府侵犯人權嘅問題有關，當中包括：

• 透過引用外國腐敗官員受害者正義法（馬格尼茨基法案）向中共政權、香港政府同埋香港警務處有關官員，追究干犯人權同警暴責任，對呢啲官員實施制裁措施，包括封鎖同凍結相關人仕資產；
• 為香港人、西藏人、維吾爾族人、中國人同埋其他因中共而需尋求庇護嘅人士提供人道主義支援；
• 保障加拿大國民嘅基本自由，以及積極反制中共向加拿大傳播媒體，發報虛假資訊同埋政治干擾及操控；
• 調查同反制中國政府對加拿大公共同私人機構所作出嘅干預。推動同埋訂立外國代理人登記冊，外國影響力透明化法案；制止所有透過中國政府、中國學生學者聯合會、孔子學院同埋中共統戰部所作出嘅一切政治、文化、外遊開支、私人餽贈同埋私人活動上嘅資助；
• 停止向中國出口所有用喺侵犯人權嘅軍事／警察嘅產品同科技。

事件

共同創辦人疑被中國政府恐嚇

加拿大媒體《Global News》同香港《立場新聞》喺2021年4月報導，組織共同創辦人王卓妍喺2020年1月準備ACHK嘅時候，佢入住一間酒店，期間收到一個恐嚇電話，當中準確咁講咗佢個名同房間號碼。佢向警察求助，但警察就話呢啲行為多少係喺法律灰色地帶，政府可以做到嘅嘢唔多。而《Global News》就形容，呢件事係眾多中國相關人權運動者被恐嚇嘅例子之一。