蠟青，亦叫瀝青，係黏度好高嘅有機液體，黑色，會溶喺二硫化碳裏面。佢形態以柏油或者焦油為主。
柏油形態嘅蠟青，係將原油用分餾法提煉嘅。佢喺原油裏面，沸點最高，同埋原油裏便，最重嘅成份，所以會喺分餾塔最底度搵到。而焦油形態嘅蠟青，就係將有機物質（煤炭為主），經過乾餾法處理而取得。
蠟青多數用喺建築上，好似鋪馬路噉。
蠟青英文有分asphalt同bitumen，但唔同地方有唔同解釋，有時會混用。Bitumen主係講自然形態嘅蠟青，而asphalt係石油提煉嘅副產品。不過實際上好多時各處鄉村各處例，各有各解。有時又會指係蠟青同石屎混合物，鋪路用。
