Associated Equipment Company
Associated Equipment Company（通常簡稱AEC）係英國一間巴士、無軌電車及貨車製造廠。喺拉丁美洲同埋西班牙，AEC嘅車係以ACLO名義賣。
史
[編輯]AEC嘅業務係源自1855年喺英國倫敦成立嘅巴士公司London General Omnibus Company（LGOC）嘅巴士生產。LGOC喺1909年響倫敦Walthamstow整出佢嘅第一款巴士「X型」，其後再出「B型」巴士。
1912年7月，LGOC嘅巴士生產業務分拆為一間新公司，即係AEC。第一次世界大戰爆發後，AEC重出埋貨車。
1926年，AEC同丹拿合作組成Associated Daimler Company（ADC），同年AEC嘅生產線搬去倫敦Southall。1928年ADC解體，兩間公司就分返開，喺之後幾年，AEC開發自己嘅新產品。1933年，LGOC嘅巴士服務被併入倫敦運輸局（London Transport，當時全名London Passenger Transport Board），自此AEC正式獨立。
第二次世界大戰期間，AEC集中生產軍用車。1946年，AEC同埋利蘭共同組成British United Traction（BUT），去生產無軌電車同埋鐵路等產品。
1948年，AEC收購Crossley Motors同埋Maudslay Motor Company，組成Associated Commercial Vehicles（ACV）。喺之後幾年，Crossley同埋Maudslay本身出嘅車陸續停產，改出其他嘢。1949年，ACV再收購巴士車身製造廠Park Royal Vehicles同埋附屬公司Charles H. Roe。1961年，ACV再收購Transport Equipment (Thornycroft)。
1962年，ACV俾利蘭收購，利蘭喺1968年再同英國汽車控股公司合併為英國利蘭汽車公司。AEC雙層巴士生產去到1968年完咗，之後其他AEC本身出嘅車亦陸續停產，AEC間廠喺1979年5月執笠。