CAT (翻譯)

  提示：呢篇文講嘅唔係翻譯器或機械翻譯。

典型嘅 CAT 畫面，左：主畫面、右上：配對一覽、右下：詞彙表

CAT（全寫 computer-aided translation），中文譯電腦輔助翻譯，喺專業翻譯，係指一種將翻譯工作入面比較死板嘅部分半自動化嘅輔助軟件，佢本身並唔係機械翻譯，但係現時多數嘅 CAT 都可以駁機械翻譯，用嚟幫翻譯員起稿。

構成 CAT 嘅基本功能係句子切割（segmentation）、翻譯記憶（TM，translation memory）同配對。所謂句子切割係指將原文嘅段落切成類似句子嘅較細單位，等翻譯員唔使成段譯，而係逐句嚟，而翻譯記憶就係一種數據庫。翻譯員將切割咗嘅原文譯好之後，CAT 會將原文同譯文都放入翻譯記憶；之後，當相同或者近似嘅原文再次出現，隻 CAT 就會將搵到嘅可能啱用嘅譯文（matches）顯示畀個翻譯員揀，個翻譯員可以揀、唔揀，或者揀咗再改，呢種搵舊譯文嘅功能叫配對。

配對唔一定要全中，而係可以搵唔到原文，但係搵到近似句子，都會照出，顯示出嚟畀個翻譯揀，但係會嘜maak1低（軟件心目中）中咗百分之幾，咁樣唔係全中都照出嘅叫模糊配對（fuzzy match）。

坊間嘅 CAT 當中應用程式同網上服務嘅版本都有，但係有啲翻譯員基於保密理由，認為唔應該用網上服務。用樣理由，好多翻譯員都唔會駁機器翻譯，因為佢哋認為將原文傳去伺服器即係將資料畀咗第三方，係合同或者專業守則唔容許嘅事；呢個理由係同個翻譯員支唔支持機器翻譯無關。

好多 CAT 亦都有自訂詞彙表嘅功能，等翻譯員可以將同一領域、客人或者專案嘅詞彙寫入去，等譯文用嘅詞彙可以前後一致。

CAT 只會對可以半自動化嘅翻譯有用，對於例如譯小說之類嘅創意性翻譯，CAT 嘅用處有限。

衍生問題

CAT 嘅句子切割功能淨識跟住原文嘅次序機械式咁切割，如果源語言同目標語言嘅文法相差太遠，咁樣切割並唔會幫到個翻譯員。最簡單嘅例係中英文句號、逗號用法唔同，原文係英文，切割之後，如果翻譯盲目跟機直譯，出嚟嘅中文句子就會過短；相反，原文係中文，如果盲目跟機譯做英文，出嚟嘅英文句子就會係技術上唔啱文法嘅 run-on sentence。又例如，中文信同英文信嘅格式唔同，將一封英文信放入 CAT，出嚟啲嘢會錯嗮次序，如果翻譯社硬要個翻譯用 CAT，就可能要人手譯完封信之後夾硬順序打篇譯文入個 CAT 度，即係個翻譯記憶會亂嗮；比賽規則等等亦有類似情形。翻譯社盲目要翻譯員用 CAT 係造成西式中文嘅原因之一。

另外，有嘅翻譯員同有啲翻譯社相信 CAT 嘅配對功能係準同有用嘅，令佢哋相信如果個 CAT 搵到配對就即係可以做少啲嘢，可以減價，有啲翻譯社甚至會壓價。但係如果源語言同目標語言嘅文法相差太遠，搵到配對可能冇意義，例如英譯中，英文一般冇量詞，如果原文有一大堆數字，翻譯員要判斷使唔使加返量詞，加埋翻譯記憶以為嗰大堆數字可以自動處理，可以令到個翻譯員比唔用 CAT 更加煩。