IT狗

  想搵ViuTV劇集嘅話，請睇IT狗 (電視劇)。

IT狗係一部分香港人對資訊科技界從業員嘅稱呼，有時帶有貶義，但亦有資訊科技界從業員攞佢嚟自嘲。

稱呼起源

IT狗呢個稱呼，起源於網上流傳嘅一本名叫《數學與科技》嘅教育雜誌，入面一個單元故事《超級無敵IT狗》，其中一頁出現一幅有一個叫做珍妮嘅女子同一隻叫做「IT狗」嘅機械狗對話嘅漫畫。

自從呢個稱呼出現之後，有啲人就用呢個稱呼，形容香港嘅IT人冇人重視，人工低，『做到隻狗』每次公司裁員都係最先開刀，喺學校做資訊科技支援甚至會俾老師侮辱。

另外，呢個稱呼亦有時會呼應一啲人對資訊科技界從業員外形嘅刻板印象，例如黑框眼鏡、頭髮多油凌亂、著格仔裇衫等等。

文化影響

• 無綫電視劇集《愛·回家之開心速遞》，就曾經有一集名為《我是IT狗》，講述資訊科技從業員工作嘅辛酸。
• ViuTV喺2021年製作咗一套用資訊科技從業員做題材嘅喜劇劇集，個名就係叫《IT狗》。