MK人

出自維基百科,自由嘅百科全書
(由MK仔跳轉過嚟)

MK人香港用語,係指嗰啲成日喺旺角出沒嘅青年人,佢哋有時畀人「好」(但係多數都係「讕潮」)嘅感覺。呢個名喺以前好興,電台DJ係原因之一。當中嘅MK就代表Mongkok(旺角)喇。男嘅叫MK仔,女嘅叫MK妹,佢哋嘅文化就叫MK文化

點解[編輯]

某人單單住喺或者成日出入旺角,唔等於就係「MK人」;嗰個係主要對嗰啲跟隨潮流但係又唔係全係潮流,感覺係不倫不類嘅人嘅稱呼。有啲外人會簡單噉將佢哋歸入非仔非女之流;然而「MK人」所指嘅,正正就係嗰啲裝腔作勢,外強中乾,唔行偏門揾食嘅後生仔女。

佢哋覺得自己扮得好鬼有型,重以為會因為噉而吸引到好多男/女性趨之若鶩去兜搭佢哋,於是就經常自拍擺上網。[1]佢哋當中多數都愛流連夜店、的士高,男嘅就為咗有女陪,而女嘅就貪玩怕寂寞,咁就可以講係各得其所。佢哋扮晒憤世不羈,但係又唔知憤世係咩嘢,所謂不羈其實即係冇人生目標,總之就係「今朝有酒今朝醉,明日愁來再買醉」。

有啲唔算貴嘅私家車款,被人叫做MK車,笑佢等低俗浮誇。任何車俾人配置啲搶眼/吵耳而冇乜用嘅部件或者裝飾品,又或者司機車品唔好,都可能被投以「MK」之謔稱。[2][3]

地位[編輯]

其實,MK人多數來自社會下層(階級),實際上冇錢使,冇世藝,冇自信……面對官員、先生同前輩親朋戚友等普遍讚賞,拜金崇權嘅所謂香港主流文化,自慚形穢,不過又偏偏要自欺欺人,於是乎就鍾情於啲使費同學養要求都低,又驚死人哋唔為意嘅打扮、講嘢用行為風格,嚟掩飾自卑同圍爐取暖,形成種所謂次文化。

與前者相對——有錢人靠豪宅靚車名錶來炫耀;肚入面墨水多嘅,就用久經浸淫而成嘅文雅儀態同含蓄語調來流露之;品味就靠坐定定食雪茄同飲陳年洋酒來展示;掌權嘅會低調直接用,擅於合法行惡,就算俾人捉到技術失誤,都重有大把板斧用得,可能甩到身。

MK人冇本事噉樣演嘢,就唯有成日靠所謂速成變光鮮,實質虛有其表,依然俾異類人睇唔起嘅方法,來獲取同道中人嘅自信,形成咗個「睇得唔打得」嘅小圈子——旺角啲商場有好多舖頭仔賣雜嘜平價服飾;MK風格口語特色係總詞彙少、密密使新式簡寫/稱、猛咁用虛詞/多義詞(例如取粗口字同性無關之義)、廢話多,又有大把錯/借字——有時俗稱「火星文」;喺條街道食煙仔,飲啤酒,就算明白會因而引嚟欺善怕惡嘅差人打攪,都在所不惜;心口掛個勇字,郁啲就無謂過界,只要犯些少錯就會俾「恭候多時」嘅「秩序維持者」捉去交數或者發泄。

己亥事變以來,政治格局劇變,做MK人嘅風險大增。針對後生仔女嘅政治類冤案湧現;清白人士由於對此毫無防範,兼且冇權冇勢冇後台,遇上厄運時往往只能坐以待斃;相反,黑幫成員同賊匪等時刻準備十足,熟悉顯規則同潛規則,又有人脈,脱離真案或者假案嘅能力都高好多,生活所受嘅影響較少。

定型[編輯]

典型MK妹十零廿歲,濃妝豔抹,着背心、熱褲同撻人字拖,成日食煙仔、吹水同講粗口,性格反叛,鍾意喺街道遊來遊去,又時不時去酒吧同夜場。佢等喺2000年代零舍常見,畀人百無聊賴嘅感覺,可以叫做香港地道文化嘅代表之一;後來式微,取而代之嘅係南韓同偽ABC風格。响2020年,來自香港嘅畫師蕭邦仲,以此為主題,喺台灣出版咗本鹹濕漫畫書《MK妹》。[4][5]

MK仔原形,模仿電影《古惑仔》入面若干角色,特徵係着黑色緊身背心、爛牛仔褲,樂於露啲文身出嚟。頭髮染到五顏六色,陰仔長到遮到眼,脾氣暴燥,動不動就睥人,講嘢時郁啲就「屌人老母」,後嚟興戴純黑口罩,兼且着Supreme、Thrasher同Stussy等牌子嘅服飾。呢啲風格一路淡化,喺2010年代,南韓潮流文化喺香港風行,與前者揉合,形成MK pop造型。[6][7]

睇埋[編輯]

參考[編輯]

  1. 時今日,還有所謂MK仔嗎?. POP (美國英文). 2016-07-20. 原先內容歸檔喺2021-06-11. 喺2021-06-11搵到.
  2. Honda EK9|22歲女司機喜歡Type R熱血懶理MK妹負評 搞全女班棍波車會車聚:女人係識揸車嘅 | 蘋果日報. Apple Daily 蘋果日報 (香港中文). 原先內容歸檔喺2021-06-11. 喺2021-06-11搵到.
  3. Book:筋肉Van踢走MK味 | 蘋果日報. Apple Daily 蘋果日報 (香港中文). 原先內容歸檔喺2021-06-11. 喺2021-06-11搵到.
  4. 121625551334730. MK妹絕種土繪師以成人漫畫紀錄MK文化 末代MK妹:我係最後一滴血|壹週刊. (香港中文). 原先內容歸檔喺2021-06-10. 喺2021-06-11搵到.{{cite web}}: CS1 maint: numeric names: 作者名單 (link)
  5. MK妹 | 香港都有自家製成人漫畫 在台港人期望本地創作更貼地 | 蘋果日報. Apple Daily 蘋果日報 (香港中文). 原先內容歸檔喺2021-06-10. 喺2021-06-10搵到.
  6. 角文化MK仔2018是甚麼樣子? 穿Supreme就是MK? | 蘋果日報. Apple Daily 蘋果日報 (香港中文). 原先內容歸檔喺2021-06-10. 喺2021-06-10搵到.
  7. 舊MK大格鬥 霆鋒激戰天堂鳥 | 蘋果日報. Apple Daily 蘋果日報 (香港中文). 原先內容歸檔喺2021-06-10. 喺2021-06-10搵到.

出面網頁[編輯]