孫中山紀念館（Dr. Sun Yat-sen Museum）位於香港中環衛城道7號，前身係香港富商何東細佬何甘棠嘅官邸甘棠第。紀念館係香港歷史博物館嘅第四間分館，介紹中華民國國父孫中山嘅生平以及佢同香港嘅關係。紀念館喺2006年12月12日正式開幕，以紀念孫中山先生出世140周年。
甘棠第起喺斜坡上面，樓高3層，總樓面面積19,672平方呎，屬於英皇愛德華式古典建築風格。外牆就係用紅磚同埋花崗岩砌成，一、二樓都有個弧形露台，用希臘式巨柱承托，樓房設有前、後樓梯，以前前樓梯係畀主人何氏家族用，而後樓梯就畀工人用嘅。