星期，或禮拜、曜日，係長過日短過月嘅時間計量單位，喺而家現代社會一個星期有七日，而星期嘅週期同月同年嘅週期冇相干，大家個基本單位就係日喇。
星期係古巴比倫人創造嘅一個時間計量單位，一個星期為七日，分別用太陽、月亮同五大行星七粒星嘅名（合埋叫七曜）命名，所以就叫做「星期」或「曜日」喇。
亦因為天主教每七日要做一次禮拜，所以星期又叫做「禮拜」。
以天文學角度嚟講，一星期嘅第一日應該係星期日，但有啲國家有唔同嘅定義。
- 星期一（月曜日）
- 星期二（火曜日）
- 星期三（水曜日）
- 星期四（木曜日）
- 星期五（金曜日）
- 星期六（土曜日）
- 星期日（日曜日）
喺日文韓文同埋好多其他語言入面，佢哋對星期一至星期日嘅叫法都係按照月火水木金土日嘅星球嘅名嚟嗌。
英文嘅Sunday，Monday，Saturday都係對應日月同土星嘅名。
日文嘅名就如上係用日曜日噉樣稱呼。
