|
一句講嗮： 2016年3月25號係粵文維基百科嘅十周年紀念日。
|
粵文維基百科係2016年3月25號迎嚟十周年嘅紀念日。呢一年同時係成個維基百科十五周年紀念。
粵文維基百科十年嚟，經歷唔少，總共寫咗43,601篇文章、1,039,593下編輯[1]。文章嘅創作編輯，都係由超過七千位無私嘅維基人[2]做嘅。雖則同超過六千萬粵語用家人數去比較，呢度嘅發展只算係「蚊比同牛比」，之不過經已足夠造就呢度成為網絡上至大規模嘅純粵文網站，成果一啲都唔算失禮。
可惜嘅係，粵語嘅地位喺過去十年嚟一路遭受打壓，推普廢粵嘅勢頭一路都未停過，當中主要嘅事件包括2010年廣州當局建議電視台全面改用普通話，引發撐粵語行動；同埋2014年香港教育部門將粵語形容做「不是法定語言的中國方言」（唔係法定語言嘅中國方言），刻意矮化粵語喺香港嘅地位等等。正因為噉，粵文維基百科作為網上最主要嘅純粵文網站，「捍衛粵語文化」嘅使命實在係責無旁貸嘅。
展望將來，祝願粵文維基百科喺下一個十年，可以吸引到更多粵語用家一齊幫手，開多啲文、寫好啲文，落力噉將用粵語寫文嘅文化一路保存落去。捍衛粵語，為時未晚。若果你重未開戶口，就嗱嗱臨郁手啦！
| 
