Help:編輯摘要
(由Wikipedia:編輯摘要跳轉過嚟)
 | 一句講嗮：每次編輯時，最好喺「編輯摘要」寫下改咗啲乜。 |
當改緊維基頁面時，內容方框下低有個寫住「編輯摘要」嘅文字框。
| 編輯摘要 (簡單講下你做過嘅修改) |
框入面填嘅字將會同編輯時間一齊紀錄低，喺最近修改頁、修改紀錄、監視清單等地方顯示。
摘要寫咩好
[編輯]編輯摘要嘅用途係簡略講下你改咗啲乜，方便其他編輯審核文章質素，所以內容要精簡。但係編輯摘要唔係文章一部分，所以唔使花太多時間斟酌寫乜好。
用編輯摘要嘅目的係要促進維基百科鼓勵協作嘅核心價值。喺粵文維基百科，編輯之間對於應該點用編輯摘要，大致嘅共識係噉：
- 編輯摘要應該代表到修訂嘅內容。
- 編輯摘要內容要對其他編者有禮，唔准人身攻擊，尊重返普世同粵文明圈嘅禮儀習慣。
- 呢度係粵文維基百科，編輯摘要盡量要寫粵文。
- 其他文可以酌量使用。應唔應該用其他文，建議考慮：
- 有啲跨維基編者唔識粵文，純粹路過幫手執錯。佢哋可能用其他語文嘗試溝通，例如英文或者中文。
- 編輯摘要字數有限，亦唔係文章內容，所以適宜精簡。有時會用一啲跨維基通用嘅拉丁字簡稱。
- 若果要喺編輯擇要用其他文，唔好俾人覺得你貶低粵文同埋粵維地位。
我哋想鼓勵編者用編輯摘要，唔想搞到出現唔做唔錯嘅風氣。編輯摘要寫咗之後就唔改得，所以批評其他編者點寫編輯摘要嘅時候，唔好太執着。如果覺得人哋寫編輯摘要寫得唔好，可以去人哋嘅用戶討論頁提點一下。如果屢勸不改，尤其是出現人身攻擊，故意誤導，或者喺編輯摘要嘅用語故意貶低粵文嘅情況，可以搵管理員介入，管理員可以收埋修改等個有問題嘅編輯摘要內容唔再公開，甚至喺極端情況下Wikipedia:封鎖帳戶嚟剎停啲攞編輯摘要嚟搞搞震嘅人。