五四運動
 |
提示：呢篇文講嘅唔係五四屠殺。五四運動係中華民國一次社會運動，1919年5月4號喺北洋政府治下嘅京兆地方發生。呢次運動包括以青年學生為主嘅學生運動，以及廣大市民同商人等基層同中層都有廣泛參與嘅社會運動。成個運動包括示威、遊行、請願、罷課、罷工同暴力對抗政府等多種形式。事件起因係，第一次世界大戰結束之後，喺巴黎和會，列強將德國喺山東嘅權益轉讓畀日本，即係山東問題。當時北洋政府唔能夠捍衛國家利益，協調失敗，引起國人極度不滿，從而上街遊行以及罷學、罷工，罷市表達不滿。當時最著名嘅口號之一係「外爭國權（對抗列強侵權），內除國賊（懲處媚日官員）」「捍衛主權，內除國賊」。卒之中國代表冇簽到《凡爾賽條約》。
廣義上來講，五四運動係一次影響深遠、規模龐大嘅文化運動，包括早前「新文化運動」，對中國近代嘅政治、社會、文化、思想影響極之大。台灣教科書將五四運動同新文化運動拉埋一齊講，兩者合埋叫「五四運動」。
背景
[編輯]新思想嘅傳播同埋白話文運動
[編輯]西方思想喺晚清，尤其係甲午戰爭（又叫「中日黃海大戰」）之後大量傳入中國，並對年輕一輩中產生咗影響，但係，喺民國初年呢種影響隨住《新青年》等刊物嘅發展以及白話文運動嘅推展，自由、反抗傳統權威等嘅思想，影響咗學生以及一般市民。
北京大學為首開始改革
[編輯]中國嘅教育制度喺清末嘅新政之中已經學習西方同埋日本嘅學制，到咗民初，高等教育獲得進一步嘅發展，喺北京大學校長蔡元培嘅領導下，引進咗開放嘅學風，提出「思想自由，相容並包」嘅辦學方針，李大釗、陳獨秀、章士釗、胡適、辜鴻銘（英國文學）、劉師培、魯迅（周樹人，教中國小說史）、錢玄同（教音韻學）、吳梅（教戲曲史）、劉半農（教新文學）等俾人請咗喺北大教書，同時培養學生獨立自主開放進步嘅思想同埋精神，呢種思想同埋精神成為咗五四運動嘅重要動力。
民初以來嘅反日以及國恥情緒
[編輯]1915年，日本提出二十一條，北洋政府喺5月9號，接納咗其中大多數嘅要求，呢啲原本日方要求保密嘅協定，俾新聞界知道咗，激起咗民族主義嘅情緒，令中國知識分子同埋民眾對於日本以及「賣國」嘅政府強烈不滿，被認為係國恥，同時亦引發唔少嘅反日活動，呢種情緒喺五四運動裏面進一步發展而發揮作用。1917年8月14號，北京政府向德國宣戰，成為咗第一次世界大戰嘅「參戰國」。1918年初，日本向段祺瑞控制嘅北京政府提供咗大量貸款，並且協助組建同埋裝備一支中國參戰軍，啲貸款重俾人用喺安福國會龐大嘅賄選開支。
9月，北京政府同日本交換關於向日本借款嘅公文，作為借款嘅交換條件之一，又交換咗關於山東問題嘅換文，主要嘅內容有：
北京政府喺換文入面，對日本嘅提議「欣然同意」，駐日公使章宗祥向日本政府親自遞交換文，後嚟俾北京學生打。中國對德宣戰，同日本一齊都係戰勝國，但係德國喺山東嘅權益就收唔返，反而俾日本擴大咗，呢一份換文就成為巴黎和會上日本強佔山東嘅藉口。
導火線
[編輯]1918年11月11日，協約國與同盟國代表正式簽署停戰協議，史稱「貢比涅停戰」，又稱康比涅停戰。1919年1月，第一次世界大戰戰勝國喺法國巴黎召開「和平會議」，對戰敗嘅國家進行審判。喺會議上，中國政府代表提出廢除外國在華勢力範圍、撤退外國在華駐軍等七項希望、取消日本強加嘅「二十一條」及換文嘅陳述書，但被拒絕。巴黎和會冇當中國係戰勝國，決定將德國喺中國山東嘅權益轉交日本，只係歸還八國聯軍侵入北京時被德國掠走嘅天文儀器。北洋政府仲準備喺呢條合約上簽字。消息傳到中國之後，北京學生群情激憤，學生、工商業者、教育界同好多愛國團體紛紛通電，斥責日本嘅無禮行徑，並要求中國政府堅持國家主權。喺呢種情況下，和會代表提出關於山東問題嘅說帖，要求歸還中國喺山東嘅德租界同埋膠濟鐵路主權，以及要求廢除《二十一條》等合法條件。但結果，英、美、法、日、意等國唔理中國民眾呼聲，終於喺4月30號簽訂《協約國和參戰各國對德和約》，即《凡爾賽條約》，仍然將德國喺山東嘅權益轉送日本。喺巴黎和會中，中國政府嘅外交失敗，直接引發中國民眾嘅強烈不滿，從而引發五四運動，為後來嘅北伐戰爭奠定咗基礎。