地標係指能夠代表一個地方嘅景點，通常分自然同人工兩類。例如香港嘅地標係維多利亞港、尖沙咀鐘樓等。對飛機師來講，大嶼山天壇大佛係香港國際機場嘅地標，唔怕會飛錯去澳門或者珠海機場。
喺環境平面設計，地標指任何可以標示地點嘅建築物或者其他嘢，唔需要係景點。例如，如果你見到某間大廈就知要落車，嗰座大廈對你來講就係一個地標。
