大聖劈掛門

大聖劈掛門即係指兩門功夫，《關外大聖門》即係指猴拳，《少林劈掛門》係北方一種長橋大馬。猴拳由陝西人寇四所創，寇四傳人耿德海宗師自細跟阿爸耿榮貴學家傳嘅劈掛門武術，後來又得寇四猴拳真傳，其後來香港設館授徒，將兩派武術合併，創立咗「大聖劈掛門」。大聖門武術主攻下三路，而劈掛門武術就主攻上三路，重有七十二把擒拿手主攻關節。大聖劈掛門武術已列入《香港首份非物質文化遺產》。

簡史

民初內戰期間，陝西人寇四因為打傷軍閥瓜牙而畀人追捕，畀耿榮貴救咗，但寇四最終都畀人捉咗去坐監。坐監期間，寇四整理自己嘅武術嗰陣，睇到啲馬騮仔紮紮跳，動作靈巧，就啟發咗佢武術思路，創咗套「五路猴拳」，即係猴拳或者大聖拳。

出獄之後，佢走去搵返救過佢嘅耿榮貴諗住報恩，點知耿榮貴已經仙遊。佢見耿榮貴個仔耿德海已經長大成人，就將佢套猴拳傳授畀佢。

耿德海一直有跟老豆耿榮貴學劈掛拳，呢門武術係佢家傳絕學。耿德海喺劈掛拳基礎上，加入寇四真傳嘅猴拳，就創立咗「大聖劈掛門」。

南傳

耿德海宗師後來做咗鏢師，又喺南京中央國術館做刀、劍科總教練。喺八年抗戰嗰陣，又喺東北軍教大刀隊，因為咁而成為日軍針對目標，之後走咗去廣州教咗幾年之後再南移嚟咗香港，1930年成立咗民眾國術社，開始發揚大聖劈掛門拳術，喺咁多弟子之中，最享譽武林嘅有馬騮王之稱嘅陳秀中宗師。

1954年陳秀中宗師得到耿德海許可開館授徒，培育咗一班出色拳手，部份成為香港功夫電影影星，分別有：陳觀泰（因太反骨已被逐出師門）、陳少川、萬榮佳、萬榮耀、劉偉民、李飛標、周強（因為同逆徒陳觀泰勾結被逐出師門）、冼林煜、黃秋生、高雄、黃志偉、冼灝英、何家輝、梁富新、錢嘉樂、錢小豪、白彪等。

套路

拳術

劈掛拳共三路、劈掛膀手、劈掛穿手、馬步踢退式、劈掛短打、二郎拳、燕青拳、太祖拳、少林拳、進退連環拳、形意拳、自然拳、鴛鴦拳、八掛掌、武松脫扣、綿拳、太極拳、八極拳、迷綜拳、八把貓功、黑虎拳、地蹚四平拳、石猴拳、企猴拳、木猴拳、迷猴拳、醉猴拳、猴拳對打、地瞠四平拳對打、劈掛拳對打、八極拳對打、太極推手、摔角、散手、擒拿手、自由搏擊。

刀術

劈掛單刀共二路、太極刀、形意刀、斬馬刀、八卦雙刀、地蹚雙刃、地蹚青龍刀、春秋大刀、單刀對槍、雙刀對槍、斬馬刀對槍。

劍術

劈掛劍、八劍式、生門創、進退連環劍、純陽劍、子路提袍劍、昆吾劍、形意劍、太極劍、雙獅劍、真武劍、武當劍、迷雙劍、白蛇雙劍、白鶴雙劍、劍對劍。

棍術

劈掛棍、九洲棍、猴子天門棍、大哨子、少林棍對打、劈掛棍對打、三節棍對槍、大哨子對槍。

槍術

劈掛槍、奇門槍、六合大槍、攔馬橛、金槍廿四式、太極槍、地蹚連環槍、蛇茅槍。

其他

護手單勾、九節鞭、繩鏢、虎頭雙勾、雙、太極氣球勢、十三節獨龍鞭、地蹚大手鞭、地蹚單刀鞭、地蹚雙釵、六路猴形筆、六合判官筆。