愛爾蘭鐵路

停喺都柏林塔拉街車站嘅愛爾蘭鐵路通勤火車。車身顯示器顯示嘅文字嘅意思係：「終點站：皮亞士車站」。

愛爾蘭鐵路（愛爾蘭蓋爾文：Iarnród Éireann；英文：Irish Rail）係愛爾蘭共和國嘅國家鐵路運營公司，1987年2月成立，宜家係國營企業愛爾蘭運輸系統（愛爾蘭蓋爾文：Córas Iompair Éireann）嘅子公司。愛爾蘭鐵路負責運營愛爾蘭共和國境內所有城際客貨運火車，同時同北愛爾蘭鐵路共同運營來往都柏林同貝爾法斯特之間嘅奮進號快車（英文：Enterprise）。

雖然歐洲議會喺2001年通過咗歐盟91/440號法令，要求歐盟成員國運輸部門停止參與國營鐵路公司嘅運營，同埋開放鐵路市場畀私營鐵路公司，但係直到2013年為止，愛爾蘭係唯一一個重未將運輸部門同鐵路公司分離嘅成員國，而歐盟亦都暫緩喺愛爾蘭執行伊項法令。2012年，由於暫緩期限就快到，愛爾蘭政府就開放市場嘅相關事項進行咗公眾咨詢。暫緩令喺2013年3月14號失咗效。