爹利
爹利（英文：Terrier），又叫㹴犬或者㹴，係一類最初係為打獵同消除毒蛇害蟲而培育出嚟嘅狗種。佢哋雖然一般身形較細，但係好勇猛，堅強；具有精力充沛、活躍，近乎過度活躍嘅個性。最大嘅爹利種類係萬能爹利（Airedale Terrier）。
大多數爹利品種都係喺英倫三島培育出嚟嘅。佢哋被用嚟控制消除地面同地底嘅老鼠、野兔、狐狸。大一啲嘅爹利被用嚟獵獾。實際上，英文「terrier」 嚟自中世紀法文「terrier」（源自拉丁文「terra」），泥土嘅意思。但係，凱利藍爹利（Kerry Blue Terrier）同萬能爹利（Airedale），就係以捕獵深水中嘅水鼠同水獺而出名。
爹利嘅鬥志使到佢哋被利用喺所謂嘅競賽中。最初，佢哋被用喺例如「清鼠穴」噉樣嘅比賽中，以最快速度殺嗮成竇老鼠就贏。牛頭爹利係特別培育出嚟用於鬥狗嘅品種。
今時今日，好多爹利都係用嚟做寵物狗，係最佳嘅家庭伴侶狗種。佢哋普遍對主人忠誠、親善；但係佢哋嘅火爆個性需要嚴格管教。
爹利亦係好多愛狗協會認可嘅正式官方犬種，包括美國愛狗協會（AKC）、澳洲國家愛狗協會（ANKC）、加拿大愛狗協會（CKC）、國際愛狗協會（FCI）、英國愛狗協會（KC(UK)）、新西蘭愛狗協會（NZKC），同埋美聯愛狗協會（UKC）。
喺英國以外培育出嚟嘅爹利品種嘅地位有啲混亂。比如，迷你史納沙（Miniature Schnauzer）喺美國愛狗協會被列為爹利，但喺英國就唔屬呢一類。波士頓爹利係一種真正嘅爹利，但係美國冇被列為爹利。西藏爹利同俄羅斯黑爹利雖然有「爹利」個名，但只係個名啫，並唔係爹利。
種類
[編輯]喺18世紀嘅英國，爹利通常被分為短腿爹利同長腿爹利兩個類型。 而依家，爹利則按功能或大細分為以下幾種類型（非官方分類）：
- 工作爹利：包括鑽山爹利同狩獵爹利。
- 玩具爹利
- 牛形爹利