璀璨寶石

Splendor

設計者	Marc André
發行商	Space Cowboys
玩家數量	2 to 4
遊戲時間	30 minutes
要嘅技巧	資源管理

璀璨寶石 (Splendor) 係一隻2-4人一齊玩嘅棋盤遊戲，由Marc André設計，Pascal Quidault插圖。佢係由Space Cowboys，Asmodee喺2014年發行。呢隻遊戲喺2015年開發咗手提電話版應用程式。2017年發行咗擴充包。

遊戲

Splendor係一款資源管理遊戲,2-4個玩家需要收集寶石,然後用相應嘅寶石換取發展咭。

發展咭有三個等級: (•、••、•••),係代表購買嗰張卡嘅難度。

發展咭亦包括寶石獎勵,等玩家可以用於折扣嘅方式購買之後嘅發展卡。

遊戲開始前，將 n +1 數量嘅貴族牌面朝上放喺最高嘅位置， n係玩家人數。將每個級別（•、••、•••）嘅發展咭面朝上打開四張擺喺中間，其餘嘅放返入相應難度級別嘅牌組入面。寶石則依玩嘅人數放置唔同數量(2人每款4個,3人每款5個,4人用晒每款7個)擺喺最低。

玩家每回合必須揀下面其中一個動作:

• 喺寶石區域中拎最多三種唔同顏色嘅寶石。
• 喺寶石區域中拎兩個相同顏色嘅寶石(前提係呢個顏色至少剩低四個) 。
• 拎一個金寶石同保留一張發展咭,(但持有嘅保留發展咭總數唔可以超過三張) 。
• 花費所需嘅寶石代幣或/和使用玩家之前購買嘅發展咭上面嘅寶石獎勵嚟購買發展咭。

呢個動作之後:

• 如果玩家有足夠嘅發展咭獎勵觸發到貴族點數獎勵,就可以拎走貴族牌。
• 每一回合只可以拎一張貴族牌;玩家可以喺符合條件嘅貴族牌之間揀其中一張。
• 玩家可以保留貴族牌直到遊戲結束。
• 貴族牌唔會喺遊戲過程中補充。
• 如果玩家擁有超過10個寶石,就需要退返寶石到總數係10個或者更少。
• 如果購買發展咭,空白位置會即刻喺相應牌組最頂嗰張補充。牌組用晒之後,就會保持空白,唔需要再補充。

遊戲結束

當有一個玩家達到15點聲望，所有玩家會玩埋當前嘅回合，直到每個玩家都完成相同嘅回合數，遊戲就結束。

計分方法

遊戲結束咗之後，最多聲望嘅玩家係贏家；打和嘅話，買得最少發展咭嘅玩家係贏家。如果仲係打和，保留牌最少嘅玩家係贏家。如果都仲係打和，咁就會一齊贏喇。