社交借貸

社交借貸，又叫P2P借貸（英文：peer-to-peer lending），係借貸雙方利用網絡平台直接聯繫，進行貸款同提供資金，促成貸款，免除中間人高昂嘅運作成本，好似銀行嘅舖租同推銷成本等，俾有良好經濟能力嘅資金提供者利用自己空餘嘅資金幫助有需要人士，促進資金流動嘅效率。借款人可能享有比銀行低嘅利息，而資金提供者亦可以略過銀行直接賺取利息。大多數社交借貸網站經營無抵押私人貸款，另有少部分經營中小企貸款。

社交借貸起源於英國，2005年首個社交借貸網站Zopa開始營運。

依家社交借貸喺歐美非常盛行，例如美國嘅Lending Club已借出超過20億美元，Prosper Marketplace已借出超過5億美元，英國嘅Zopa已借出超過3億英鎊等等。Google更拆資1.25億美元入股Lending Club，而Lending Club亦已上市。

英倫銀行總監Andrew Haldane更預料P2P借貸長遠或者可代替銀行嘅角色。

2013年6月美國兩間社區銀行Titan Bank同Congressional Bank亦加入Lending Club平台成為資金提供者，Titan Bank總監Jonathan Morris相信社交借貸平台係未來借貸主流。

社交借貸喺亞洲發展比較慢，南韓、日本、中國亦相繼出現社交借貸平台。香港首個網上社交借貸平台Welend喺2013年6月開始運作。