紅清真寺

紅清真寺喺伊斯蘭堡嘅位置，衛星相由美國太空總署提供。

紅清真寺（Lal Masjid ，烏都文（Urdu）: لال مسجد），又叫做拉爾清真寺，多數譯做紅色清真寺，係喺巴基斯坦首都伊斯蘭堡嘅一間清真寺。呢間清真寺以信奉回教激進派薩拉非主義（Salafism）為主，由拉什德（Ghazi Abdul Rasheed）同阿齊茲（Maulana Abdul Aziz）兩兄弟掌管，兩個人都係激進神學生組織嘅精神領袖。佢哋宣揚塔利班式嘅價值觀，喺阿富汗接壤邊境部落地區深得民心，所以巴基斯坦政府一直唔敢郁佢。但喺美國壓力下，巴基斯坦政府終於武力鎮壓佢哋，咁佢哋就用一連串嘅暴力來反擊，包括自殺式炸彈。由於呢一連串暴力事件都係圍繞呢間清真寺發生，令呢間寺成為國際新聞焦點

背景

紅清真寺舊主持阿不杜拉（Maulana Abdullah），同巴基斯坦最長期嘅獨裁者齊雅哈克將軍（General Zia-ul-Haq）係老友。阿不杜拉畀人暗殺後，間寺就交畀佢兩個仔拉什德同阿齊茲。

阿不杜拉至出名係成日講發動聖戰。1980年代，蘇聯入侵阿富汗，寺訓練戰士同蘇聯軍搏過。當時巴基斯坦來講，唔係乜壞事。巴基斯坦軍情處（Inter-Services Intelligence）重響寺隔籬設總部，幫手訓練戰士。紅清真寺同軍情處兩便嘅人好密切。呢個時候間寺亦變成極端回敎徒中心。

間寺到兩個仔手，佢哋同基地組織（Al Qaeda），拉登好老友。2000年，聖戰重係巴基斯坦國策。2001年9月11號，基地組織襲擊美國，巴基斯坦轉向反恐之戰，間寺否認同基地組織有關。不過佢哋冇耐就轉移向美國發聖戰，同總統穆沙拉夫（Musharraf）反咗面，多次號召人去暗殺佢。