美式16波
美式16波（粵拼：mei5 sik1 sap6 luk3 bo1），又嗌8波（baat3 bo1），係桌球運動嘅其一項目，亦係全球各地比較流行嘅桌球項目。比賽時，檯上面會放16隻波（其中一隻係白波，凈低嗰15隻係彩波），附近有6個袋窿。
歷史
[編輯]呢種運動從1900年代初（有記錄話係1908年）出現，直到1925年先至開始流行，嗰時凈得7隻黃、7隻紅、1隻黑呢三種色嘅波。後嚟個玩法流傳到美國一帶之後先至發揚光大，發展到多咗綠、藍、紫、橙、啡同埋花色波。而凈得七黃七紅一黑嘅玩法喺英國同全球部分VIP桌球館都重流行緊。佢嘅規則直到1940年先至收入官方規則手冊入面[1] [2][3][4]。
國際規則
[編輯]美式16波嘅規則重有好大拗數，喺商業比賽、非商業比賽同業餘比賽、個人賽都有唔同嘅規則[5][6]。但大多數都圍繞噉：
裝備
[編輯]
波嘅裝備包括咗7隻花波同7隻色波，其中花波屬9～15號[註 1]，色波屬1～7號[註 1]，黑波屬8號，白波冇任何文字。
| 波種 | 波色同波冧 | ||||||||
|---|---|---|---|---|---|---|---|---|---|
| 黃 | 藍 | 紅 | 紫 | 橙 | 綠 | 啡 | 黑 | 白 | |
| 花波 | ９ | １０ | １１ | １２ | １３ | １４ | １５ | ８ | |
| 色波 | １ | ２ | ３ | ４ | ５ | ６ | ７ | ||
比賽用檯一般揀7×3.5英吋、8×4英吋、9×4.5英吋（三揀一）嗰種。有啲特殊挑戰場地（例如花式桌球比賽）會揀用其它非長方形嘅檯嚟比賽。
擺法
[編輯].png){kind=spacer}
比賽開始嗰時，最好用三角架擺波，不過一定要符合以下要求：
- 要排喺檯嘅闊行最中間位，長行喺中間偏向自己嘅½長度位[註 2]，但唔畀黐檯邊或距離檯邊太近。
- 擺成隻等邊三角形且突出位面向檯最遠處，唔可以出現位置偏差或角度傾斜嘅情況。
- 8號波必須要擺喺堆波嘅中間位
- 三個角必須要擺成一花兩色或一色兩花嘅結構[註 3]。
- 個個波之間必須要黐埋，唔可以鬆散。
比賽
[編輯]開波
[編輯]喺第一局開波之前，比賽多數用以下兩種方式嚟決定邊個開波：掟銀仔定白波鬥遠近。揀完先後準備之後比賽開始，白波凈可以擺喺長行喺中間偏向自己嘅對面½長度位[註 4]，但唔可以黐檯邊。之後直接發波。
白波發出去之後，出現以下情況：
| 情況 | 解決 | |
|---|---|---|
| 掂到彩波後，凈得＜4個波掂到檯邊。 | 換對方重新開波或繼續比賽[註 5]。假如繼續比賽，將會按以下情況處理。 | |
| 打散啲彩波之後 | 有彩波落袋且白波唔落袋，但黑波唔落袋。 | 自己繼續打波 |
| 有彩波落袋且黑波落咗袋，但白波唔落袋。 | 自己繼續打波，但8號波重新打過或直接判自己輸贏[註 6]。 | |
| 冇彩波落袋且白波唔落袋，但黑波落咗袋。 | 自己繼續打波，但8號波重新打過或直接判自己輸贏[註 6]。 | |
| 有彩波落袋且白波落袋。 | 換對方繼續打波 | |
| 冇彩波落袋且白波落袋。 | 換對方繼續打波 | |
| 冇彩波落袋且白波、黑波唔落袋。 | 換對方繼續打波 | |
| 有彩波落袋且白波、黑波都落袋。 | 換對方繼續打波，但8號波要執返出嚟重新打過或直接判人哋贏。 | |
| （少有情況） | 一桿15個彩波冚唪唥落嗮袋。 | 自己繼續打波，但8號波重新打過或直接判自己贏[註 6]。 |
| 一桿16個波冚唪唥落嗮袋（包括白波飛出檯）。 | 1. 8號波要執返出嚟畀人哋打。 2. 直接判人哋贏。 | |
| 白波唔掂到任何彩波情況下直接跌落袋或飛出檯 | 換對方重新開波 | |
第一桿之後
[編輯]打散啲波之後，唔理有冇波落袋，都唔會直接揀正你所需要打嘅係咩色嘅波，而係睇第二桿有冇波落袋。
| 情況 | 己方情況 | 對方情況 |
|---|---|---|
| 有波落袋 | 一桿入嘅係花波 | 打色波 |
| 一桿入嘅係色波 | 打花波 | |
| 一桿入≥2隻花波 | 打色波 | |
| 一桿入≥2隻色波 | 打花波 | |
| 一桿入≥2隻波，而且色花混雜。 | 睇第一個落袋嘅係花波定色波而定。 | |
| 出現黑波落袋 | 判入黑波方輸，直接開下一場。 | |
| 冇波落袋 | 換對手繼續射，直到有彩波且白波唔落袋為止。 | |
| 有彩波落袋但白波落袋 | ||
若果第一桿出現白波落袋情況，白波凈可以擺喺發波區範圍射出去。
交換對手
[編輯]打散啲波之後，跟住落嚟嘅比賽過程入面，凡係對陣兩位其中一方打完波之後出現冇波落袋情況就要換對方繼續打波。但出現以下情況嘅，對方可以執返白波出嚟放喺檯是旦邊個位打都得。
- 對方未先射中指定嘅波[註 7]
- 對方發波之後冇掂到任何彩波
- 對方喺未打嗮指定波種落袋之前，發波之後掂到黑波嘅。
- 白波落袋或飛出檯（唔理有冇入到彩波都係噉）
- 冇波掂檯邊
- 打波時兩隻腳離開地面（除殘疾比賽或波檯冇另外提供準確桿之外）
點先至算贏
[編輯]- 通過合法途徑入嗮冚唪唥嘅花波或色波之後，將8號波射入。
- 對方通過犯規嘅方式入咗8號波
- 對方得返8號波可以射時，連同將8號波同白波一齊射落袋或飛出檯。
- 對方將8號波飛咗出檯。
嚴重犯規
[編輯]出現以下情況係屬嚴重犯規，要直接換對方射或直接結束比賽：
- 波未停低時直接出桿
- 未輪到出桿時直接開桿
混亂規則制度
[編輯]美式16波嘅規則比較亂，由於各組織辦嘅比賽都唔一樣。甚至坊間流行啲規則都唔一樣。有啲比賽開波入8號波時，圍繞直接判開波嗰位輸贏定執返重新打過；有啲比賽對犯規嘅白波擺法有要求：一係成個檯邊個位都得，一係凈限發波區；有啲比賽係開波之後凈入花波嘅凈可以打花波，凈入色波嘅凈可以打色波，兩種都入嘅係要繼續射指定波種先至限定射邊種波類。
註同攷
[編輯]- 註
- ↑ 1.0 1.1 花波係種帶顏色同白色相間嘅波，色波係種純色嘅波。
- ↑ 喺國際規則入面，檯上有點嘅位係擺15個彩波嘅地方。
- ↑ 呢度講嘅「×花×色」係「幾多隻花波同幾多隻色波」噉解。
- ↑ 喺國際規則入面，檯上有線嘅位係擺白波嘅地方。
- ↑ 前提要冇波落袋情況下，一旦有彩波落袋，比賽將會繼續，但白波落袋嘅要對方打。
- ↑ 6.0 6.1 6.2 喺國際規則入面，凡係一開波之後，8號波直接落袋嘅唔可以即刻判己方輸贏，要執返8號波重新打過，但自己重可以繼續打波。亦有部分國際非盈利賽事係直接判開波方輸贏。
- ↑ 第二桿入咗指定波之後係決定乜色嘅波。跟住落嚟對方要射花波時射咗色波或要射色波時射咗花波情況（包括波桿或身體、衫褲任意部位掂到）。
- 攷
- ↑ Shamos, Michael Ian (1993). The Illustrated Encyclopedia of Billiards. New York, NY: Lyons & Burford. pp. Page 85. ISBN 1-55821-219-1.
- ↑ Jewett, Bob (February 2002). "8-Ball Rules: The many different versions of one of today's most common games". Billiards Digest Magazine: Page 22-23.
- ↑ Ralph Hickok (2001). Sports History: Pocket Billiards 互聯網檔案館嘅歸檔，歸檔日期2007年9月22號，.. Retrieved December 13, 2006.
- ↑ Billiard Congress America (1995-2005) A Brief History of the Noble Game of Billiards 互聯網檔案館嘅歸檔，歸檔日期2007年1月27號，. by Mike Shamos. Retrieved December 13, 2006.
- ↑ 《世界標準規則》 互聯網檔案館嘅歸檔，歸檔日期2009年2月19號，.，世界撞球協會，2005。
- ↑ 《國際撞球巡迴賽8號球規則》 互聯網檔案館嘅歸檔，歸檔日期2008年7月31號，.，國際撞球巡迴賽，2006。