葉萱
葉萱（英文：Yip Maple Ying Tung Huen[1]，又名葉映彤，曾用韓文名：鄭秀晶，1994年3月21號—）係香港女畫家，喺加拿大出世[2]，因為用受害人身份公開韓國攝理教教主鄭明析性侵女信徒嘅惡行同埋做咗香港藝人方力申嘅女朋友而出名[3]。
簡歷
[編輯]誤入攝理教
[編輯]葉萱2011年17歲嗰陣同朋友、細妹喺香港銅鑼灣行街嗰陣，第一次見到攝理教教徒傳教，結果成功被招攬入教，返咗韓國加入教會。2018年到2021年間，佢畀鄭明析性侵犯17次[4]，喺佢朋友提醒下終於醒覺攝理教係邪教，但因為未能夠即刻逃離，所以喺最後一次被性侵嗰陣錄音留低證據以便公開[3]。
公開攝理教惡行
[編輯]2022年3月16號，葉萱出席韓國一個記者會，公開自己受害人身份同被性侵嘅證據。之後佢又參與Netflix紀錄片《以神之名：信仰的背叛》（In the Name of God: A Holy Betrayal）嘅拍攝，並喺2023年3月3號首映。咁啱嗰陣香港傳媒嘅娛樂新聞報道緊藝人方力申識咗新女朋友Maple Yip，叫佢「氣質版馮盈盈」。有人發現兩個人疑似係同一個人，第二日方力申承認佢女朋友就係攝理教受害人，兩人會繼續發展，又會陪伴佢去韓國出庭[5]。