親民黨

親民黨係中華民國政黨，而家係全國第四大政黨，由前中國國民黨員宋楚瑜創辦，一直係黨嘅靈魂人物。

背景

2000年台灣總統大選之前，宋楚瑜因為爭唔到國民黨嘅總統提名，決定自己出嚟選。宋楚瑜同拍擋張昭雄成立咗新台灣人服務團隊，到選舉之後，新臺灣人服務團隊改組做依家嘅親民黨。

成立之初嘅親民黨，集合咗唔少國民黨同新黨嘅人。2001年嘅立委選舉，親民黨一舉攞到46席，成為第三大黨，勢力同當時嘅國民黨有得揮，不過親民黨當時仍然同國民黨，重有新黨組成泛藍大聯合，抵抗民進黨政府。2004年台灣總統大選，連戰同宋楚瑜更加拍住檔參選，由宋楚瑜做副手，對決要連任嘅陳水扁同呂秀蓮。當時兩隊人馬喺民調方面咬得好緊，可以話係不分上下，最後「連宋配」以大約3萬票之差輸咗。

後來由於當時親民黨、國民黨立場同政見都差唔多，導致唔少黨員出於政黨資源等嘅考慮而返返去國民黨，親民黨黨勢開始下滑。到2007年，親民黨同國民黨簽咗《國親聯盟協議》，兩黨喺之後嘅立委選舉同總統選舉加強合作。但係呢個合作，重有立法院嘅改革，令到親民黨呢一類第三政黨生存空間萎縮得好快。喺2008年，台灣第一次同時舉行立委同總統選舉，當時親民黨支持國民黨嘅馬英九選總統，立委嘅人又同國民黨整合之下，親民黨甚至冇推出政黨不分區名單，政治勢力大縮水，打正旗號用親民黨名義出選嘅得返1個。另外有9個人喺國親聯盟之下贏咗，但係佢哋全部入晒國民黨黨團，成立咗6年嘅親民黨黨團宣告解散。後來親民黨唯一嘅立委林正二因為賄選，畀法庭判咗當選無效，親民黨喺立法院連一席都冇。

原先因為國親聯盟入咗去國民黨嘅親民黨人馬，喺初選輸嘅輸，退出嘅退出，令國親兩黨產生好多矛盾，宋楚瑜於是宣佈喺2012年親民黨會獨自參加立委同總統大選。宋楚瑜成功透過連署參選總統選舉，親民黨亦都推出咗唔少立委候選人，最後親民黨喺打住「跳脫藍綠」之下，政黨不分區名單贏咗2席，加埋原住民選區有1席，喺立法院可以重新有自己嘅黨團。

2013年，林正二又畀人取消立委資格，黨團又要解散。2015年，親民黨同無黨團結聯盟嘅高金素梅，同埋啱啱退出國民黨嘅徐欣瑩組成「立院新聯盟」黨團，之後宋楚瑜嘅弟子李鴻鈞亦都退出國民黨，重新加入親民黨。

2016年，宋楚瑜第三次參選總統選舉，今次拍檔嘅副手係入過立院新聯盟黨團嘅徐欣瑩。至於立委方面，親民黨嘅黃珊珊列入咗由民進黨總統參選人蔡英文提倡嘅「進步大聯盟」入面，被視為親民黨最有機會贏到地方選區嘅一次，但係因為有啲綠營擁躉始終對呢啲有藍營背景嘅候選人唔係好受，佢哋嘅票就流向區內其他有綠營背景嘅候選人度，所以黃珊珊最後都輸咗，好多由進步大聯盟支持嘅候選人都輸喺呢點。親民黨嘅不分區名單就有6%左右，有3個人當選，選後就繼續同高金素梅合組黨團。總統方面，由於國民黨最初提名深藍嘅洪秀柱做參選人，民望低落，宋楚瑜民望有一段時間更加超越洪秀柱，成為第二候選人，後來國民黨「換柱」，改派朱立倫出選，國民黨民望先至好返啲，最後宋楚瑜攞到約莫13%票數，成績比上次好好多。

喺2016年嘅總統大選之後，台北市長柯文哲同民進黨越行越遠，親民黨就開始同柯友好，喺2018年地方選舉嗰陣，柯文哲出席由親民黨牽頭嘅台北監督連線成立儀式。有指宋楚瑜曾經希望親民黨由柯文哲接棒，不過後來柯氏另組台灣民眾黨。到2019年，柯文哲、郭台銘、王金平等人都想參選總統，當時有聲音叫佢哋四個人合組「第三勢力」，最初諗住由郭台銘去選總統，點知郭台銘喺度跳草裙舞，最後重決定唔去馬，令成個陣營陣腳大亂，宋楚瑜於是喺11月重披戰袍，重講明今次選舉係佢嘅「終局之戰」。郭台銘就負責同佢自己嘅「郭家軍」，以及親民黨拉票，又支持部分台民黨候選人。同時郭台銘又擺咗一啲人入去親民黨同台民黨嘅不分區名單。與此同時，宋柯兩人關係變差，起因係柯文哲喺親民黨度撬牆腳，搵咗黃珊珊做台北副市長，市議員林國成後來又退黨，親民黨喺台北市議會嘅勢力全部冇嗮，同時兩個黨又存在競爭關係，柯文哲曾經話台民黨嘅名單比親民黨嘅名單「強好多」，雙方隔空罵戰咗一輪。

呢次宋楚瑜競選策略嘗試吸納後生仔嘅支持，特登講一啲後生仔嘅用語，例如：魔獸世界、終局之戰呢啲後生仔接觸過嘅遊戲同電影，包裝到自己比較年輕、貼地，但係今次選舉喺受到香港反送中嘅連動之下，主張同中國保持距離嘅民進黨成功反敗為勝，除咗幫本身民望低迷嘅蔡英文成功連任，民進黨喺立委選舉上都算係大勝。親民黨就喺泛藍選票呼籲歸隊同埋柯文哲嘅台民黨搶奪中間選票之下全軍覆滅，親民黨面臨泡沫化嘅危機。

2020年之後，親民黨唔少代表人物接連退黨或者加入其他政黨，例如黃珊珊喺2022年參選台北市長，被視為係柯文哲嘅繼承人，到2023年4月，佢正式加入民眾黨，不過重保留親民黨黨籍；宋楚瑜嘅大弟子李鴻鈞喺2022年獲蔡英文提名出任監察院副院長，李氏為表中立，宣佈退出親民黨；曾經以親民黨名義參選金門立委嘅金門縣縣長陳福海亦都喺2022年6月加入民眾黨；同一時間，基隆市議員郭美秀重投國民黨，令親民黨喺台灣只係剩低一個公職人員，親民黨人才趨向凋零。

2024年台灣大選，親民黨只係派咗一共10人嘅不分區名單參選，最後連1%得票率都達唔到。

選舉成績

選舉	民選票數	得票率	不分區票數	得票率	總議席	領袖
（創黨）	/	/			15 / 225	宋楚瑜
2001	1,917,836	18.60%			46 / 225	宋楚瑜
2004	1,350,613	13.90%			34 / 225	宋楚瑜
2008	28,254	0.30%	冇派出名單		1 / 113	宋楚瑜
2012	145,507	1.12%	722,089	5.49%	3 / 113	宋楚瑜
2016	150,021	1.26%	794,838	6.52%	3 / 113	宋楚瑜
2020	60,614	0.44%	518,921	3.66%	0 / 113	宋楚瑜
2024					0 / 113	宋楚瑜