金沙中國
 |
想搵第二個意思嘅話，請睇金沙。金沙中國有限公司（簡稱：金沙中國；英文：Sands China Ltd.；港交所：01928）喺澳門辦綜合度假村同賭場，其附屬公司威尼斯人澳門股份有限公司（葡文：Venetian Macau, S.A.），買咗個當地嘅副賭牌。[1]
間公司位於澳門嘅物業包括澳門金沙、澳門威尼斯人、澳門百利宮、澳門巴黎人及澳門倫敦人，又經營來往香港同澳門嘅客輪航綫——金光飛航；金沙中國係拉斯維加斯金沙嘅子公司。[2]
鑊
[編輯]稱老虎機壞咗而唔派六百萬獎金
[編輯]响2013年5月16號，東方報業集團報道：香港女人高德梅話，佢响2013年4月29號，喺金沙娛樂場打老虎機，輸咗卅多萬之後，中咗個六百萬嘅獎，啲代金券一張接住一張噉樣彈出嚟，過咗兩分鐘，有職員走埋嚟熄機，話可能有故障，又夾硬收走哂總銀碼為134.6萬，已經彈咗出嚟嘅43張同老虎機入面嘅1張代金券，重拆開埋部嘢。[3]佢同卓姓男伴侶向博監局同賭場投訴，要求磅水。[4]金沙中國嘅公關回覆呢單嘢嘅查詢時，指因為博監局調查緊，所以唔回應更多。[5]
响2013年5月21號，東方報業集團報道：博監局响2013年5月20回覆佢哋查詢時，指已經委托獨立機構調查；[6]若果涉及機件故障，賭場唔使派彩，然而客人有權攞返賭注。[7]
响2013年5月23號：區錦新陪高及卓去到博監局同佢哋閂埋門開會。之後，幾個人接受傳媒採訪……梁文潤指，局方委託咗第三方國際認證公司檢驗，同型號老虎機已經停用，初步結果顯示機器「瑕疵運作」，預計過多七至十日，會有最終結果；[8]卓透露，局方話咗上述消息畀佢哋知，又揾法律顧問畀咗啲法律意見；高對此失望，會等到調查完咗，再考慮之後點做，唔排除要求賭場賠償佢精神損失；區批評賭場輸打贏要，影衰澳門。套用拉關法例落呢單嘢，高可能只可以收到該賭局嘅損失賠償，即係大概一千銀。[9]
响2013年5月24號，區經立法會向博監局提出書面質詢，提及更多唔妥情節：賭場職員收走代金券之後，連收條都唔肯畀張，又用大批看更將高、佢嘅朋友以及後嚟到場嘅老公趕走——批評噉樣係上世紀黑社會開嗰啲賭館，唔准贏家攞錢嘅做法重現。[10]而博監局喺現場嘅稽查人員唔表明身分，同賭場經理一齊睇完現場錄影之後，一言不發，唔向事主交代任何嘢，甚至唔肯為代金券被收走一事做見證人取態曖昩，令人難以相信佢係公正嘅。事主當場向司警局人員求助，則唔受理兼被呼喝，任由賭場看更將兩手空空嘅佢哋押解離場。喺博監局人員接手處理部機器之前，賭場已經派出超過十個維修人員，拆開部出事嘅老虎機整過一輪；顯示檢測報告之所以話部嘢壞咗，可能係因為佢哋做手腳所致；高中獎時，機器未必有唔妥。[11]
响2013年6月5號：高同卓再去到博監局，要求睇老虎機檢證報告，不過對方唔肯，話份嘢係用葡文寫成嘅，要翻譯成中文同經過上司審批，至可以交畀佢——聽日就有。[12]高投訴，金沙娛樂場嘅代表喺事件之中從嚟冇露面。卓話有為下一步做好準備，唔排除向行政長官抗議。[13]
响2013年6月6號：高、卓以及高嘅另外三個朋友，去到博監局，接收咗份已經譯成中文嘅最終調查報告；其中部分內容稍後亦以公告形式發布。[14]文件定奪係博彩機瑕疵運作——高將港紙1003蚊（筆者註：此乃準確銀碼）入落部老虎機，轉咗兩次之後，每次投注都贏到個三萬一千嘅獎；喺前後廿二分鐘，機器彈出咗43張代金券，總價值為1,334,564.8，噉嘅結果喺統計學上唔可能。[15]高向傳媒哭訴，話報告內容同事實不符兼偏𥘵賭場——自己中嘅係一個六百萬嘅「神秘巨獎」，只不過代金券唔係一張過，而賭場職員喺冇博監局稽查員在場嘅情況之下，搶走咗佢啲代金券同拆開老虎機嘅唔妥做法，都冇提及。[16]稍後博監局安排高，同一直潛水之金沙娛樂場嘅三個代表嚟次閉門會議，喺該局協調之下，傾咗接近三個鐘頭，卒之成交——賭場賠償高嘅精神損失，避過佢可能嘅訴訟，又簽署咗保密協議，唔公開銀碼。區批評第26/2012號行政法規偏幫博彩公司，搞臭澳門個朵，而當局亦疏於監管，喺件事搞清楚之前，任由賭場職員搶券同拆開架機。澳門金沙發表聲明，指根據博監局嘅最終調查，涉事老虎機瑕疵運作，亦都冇證據顯示有六百萬嘅中獎，而家已經同個客拆掂咗條數。[17]
响2013年7月8號，雪萬龍對區嗰份書面質詢作書面回覆，其中並無提到賭場職員、博監局稽查人員及司警局人員有冇做過質詢文件所指控嘅多數嘢，只係籠統噉寫：[18]若果賭客被羞辱或威嚇噉趕走，可以經法律程序，試下要對方就非財產損害及精神損害賠償。賭場及機器製造商職員即場檢查同修理部機係合程序嘅，亦冇令之後嘅驗機結果唔同咗。博監局督察當時辦事依法又公正。司警局駐場人員當時嘅處事方法冇唔妥。[19]
註
[編輯]- 呢篇文啲銀碼冚唪唥用港紙計，一律係約數；特別註明嘅除外。
- 「博監局」乃「博彩監察協調局」之縮寫；「司警局」乃「司法警察局」之縮寫。
- 資料有衝突，判斷唔到究竟卓先生係唔係高德梅個老公。
- 上文提及嘅立法會書面質詢及對之嘅答覆內容，只包括喺其他段落未寫過嘅消息，以免行文重覆累贅。
攷
[編輯]- ↑ 〈企業概覽 | 金沙中國有限公司〉。hk.sandschina.com。喺2021-07-25搵到。
- ↑ "Company Information | Sands China Ltd". www.sandschina.com. 喺2021-07-25搵到.
- ↑ 〈吃角子老虎拉中2300萬 賭場拒付 ｜ 蘋果新聞網 ｜ 蘋果日報〉。《蘋果新聞網》 (臺灣中文)。2013-05-16。原著喺2021-08-22歸檔。喺2021-08-22搵到。
- ↑ 〈港女玩老虎機中大獎 金沙拒付135萬 - 東方日報〉。orientaldaily.on.cc。喺2021-08-22搵到。
- ↑ 〈港女玩老虎機中大獎 金沙拒付135萬〉。《太陽報》 (香港中文)。喺2021-08-22搵到。
- ↑ 〈獨立機構調查老虎機事件 - 東方日報〉。orientaldaily.on.cc。喺2021-08-22搵到。
- ↑ 〈獨立機構查港賭客不獲派彩〉。《太陽報》 (香港中文)。喺2021-08-22搵到。
- ↑ 〈金沙老虎機證有瑕疵 - 東方日報〉。orientaldaily.on.cc。喺2021-08-22搵到。
- ↑ 〈金沙老虎機證有瑕疵〉。《太陽報》 (香港中文)。喺2021-08-22搵到。
- ↑ https://www.al.gov.mo/uploads/attachment/written-consultation/2013/102215860a9741d2a6.pdf
- ↑ https://www.al.gov.mo/uploads/attachment/written-consultation/2013/866785860a97491604.pdf
- ↑ 〈金沙「壞機」報告今交出 - 東方日報〉。orientaldaily.on.cc。喺2021-08-22搵到。
- ↑ 〈港女稱中巨獎不獲派彩 金沙「壞機」報告今交出〉。《太陽報》 (香港中文)。喺2021-08-22搵到。
{{cite web}}: CS1 maint: url-status (link) - ↑ 〈金沙壞角子機 協議賠償 - 東方日報〉。orientaldaily.on.cc。喺2021-08-22搵到。
- ↑ 〈金沙壞角子機 協議賠償〉。《太陽報》 (香港中文)。喺2021-08-22搵到。
- ↑ 〈博彩監察協調局公佈懷疑涉及故障之角子機調查報告結果〉。《澳門特別行政區政府入口網站》 (繁體中文)。喺2021-08-22搵到。
- ↑ http://images.io.gov.mo/bo/i/2012/48/rega-26-2012.pdf
- ↑ https://www.al.gov.mo/uploads/attachment/written-consultation/2013/422395860a9750b630.pdf
- ↑ https://www.al.gov.mo/uploads/attachment/written-consultation/2013/409535860a9757d9dc.pdf