上環

出自維基百科,自由嘅百科全書
跳去: 定向搵嘢
上環嘅港澳碼頭

上環Sheung Wan),香港,響香港島北岸,屬中西區,域多厘城四環之一,北便係維港,南便係半山,東便係中環,西面係西營盤西環)。地標有信德中心西港城永安中心咁,亦有唔少中資企業辦事處。因為近海,好多碼頭都響呢區,其中就有過澳門港澳碼頭

[編輯]

上環個環,係唐人居住區嘅叫法。上環原本叫下環,建於裙帶路村一帶。今日文咸街向西,就係唐人最初建屋地,之後皇后街,再向太平山拓展。

風物[編輯]

上環東起急庇利街,西至東邊街,北便望海,南便去到堅道,約莫有49英畝,乃係香港開埠早期嘅旺地,居民多數係潮州冷。話明係舊區就零舍多舊嘢。摩囉街與及荷里活道通街都係古董,文咸東文咸西有好多南北行賣參茸海味。行經德輔道西、東邊街,奉旨一朕除,事關此地鹹魚欄共雜貨舖,重多過隔離干諾道西嘅米舖。

聞說文武廟(建於1847年)同東華醫院(建於1870年),乃係開埠初期本港華人勢力標記。事緣當其時英國佬唔理唐人福址,有乜頭暈身慶都無乜符弗。多得呢兩間善舘,幫唐人排難解紛、贈醫施藥。廟祝同院長重時不時響港督面前幫唐人講說話。

開埠初期好多唐人響太平山打蠆,事關1843年港府落柯打將中環山坡唐人趕嚟呢處。據書所載[1],1845年嗰陣域多利城(其後改名維多利亞城)經已有唐人舖頭388間,其中太平山就有121間,可見呢處旺得幾緊要。為因人多得滯,周圍就越嚟越污糟。1894年大瘟疫,屍橫遍野。港府為此大舉清拆舊屋重建。

上環西便到督就係水坑口。古時候有條山瀾,流經家下皇后大道東出海,呢條山瀾就叫水坑口。瀾水好多龍蝦,故此對面海狗爬徑(其後改名九華徑)村民周不時揸艇嚟捉。曾幾何時,港府填海,將水坑口鋪晒石屎再起樓。瘦田冇人耕,耕開有人爭,去到19世紀尾,呢處變咗港島名流出入嘅宴會酬酢之地。當旺時,水坑口左近數埋有成十幾間酒樓,即如「宴瓊林」、「聚興樓」[2]等等等等。當其時南北行商賈、銀號錢莊老闆、買賣地皮嘅有錢佬周不時都出入呢處,上半場傾生意,下半場就開廳踏艇尋歡作樂。故此,呢處亦曾係全港島獨一無二煙花之地。風月場所多如牛毛,其中大寨(貴格妓寨)有四間:「錦繡堂」、「歡得」、「奇花」、「新三花」。此外,私寨(低等妓寨)、煙舘同埋大檔(賭舘)都開到成行成市。其後港府於1903年大舉冚水坑口妓寨,通通趕晒去石塘咀。自此水坑口轉做正行生意,疋頭舖、糧食舖、雜貨舖再現,之不過,就冇往日咁墟撼。

威水史[編輯]

[編輯]

  1. 丁新豹. 《四環九約》. 香港市政局. 1994年. 
  2. 鰲洋客. 《水坑口舊事》. 華僑日報. 1949年.