六合彩

出自維基百科,自由嘅百科全書
跳去: 定向搵嘢
香港賽馬會投注站門外嘅六合彩廣告,六合彩攪珠結果亦會響呢塊板展示。

六合彩Mark Six)係香港唯一嘅合法彩票,係少數獲香港政府准許合法進行嘅賭博之一。

為咗加強打擊民間嘅字花賭博,並防止賭博資金流向黑社會等非法集團,香港政府從1975年起開售彩票,取代原先嘅馬票。負責開彩嘅係法定機構香港獎券管理局,由香港賽馬會以「香港馬會獎券有限公司」嘅名義代理接受投注。投注彩池除咗用嚟做派彩之外,餘額撥交社會福利署獎券基金用作慈善用途。最初嘅彩票係14揀6,每個禮拜攪珠開彩。為迎合大眾「以小博大」嘅心理,1976年大幅增加中彩難度及派彩,改變開彩方法為36揀6(及一個特別號碼),正式名為「六合彩」,並將開彩次數增加為每個禮拜兩次(後來更增至每個禮拜3次)。之後為維持派彩數額及增加中獎難度,曾經多次增加選擇數目。正如其他賭博模式一樣,六合彩嘅中彩回報必定遠低於成本。

投注方法[編輯]

投注[編輯]

六合彩每注港幣10蚊($5半注),有以下投注方法:

  • 每注單式投注,從設定數字中揀出6個數字。
  • 「複式」投注:揀出超過6個數字,中獎機會同投注金額需要計算出全部可能嘅6個數字組合。
  • 「胆拖」投注:揀出超過6個數字,其中一個或以上作為「胆」。中獎機會同投注金額需要從所揀數字中計算出全部可能嘅6個數字組合,但每個組合中必須包括作「胆」嘅數字。
  • 自2006年嘅端午金多寶開始,馬會會響金多寶攪珠前一個禮拜,預售金多寶攪珠彩票。除非下期攪珠係金多寶搞珠,否則投注人士應喺彩票上填寫金多寶選項,或者買飛嗰時向職員講明。

開彩[編輯]

開彩時以自動機械攪珠,從設定數字彩球中抽出六個中獎號碼同一個特別號碼。過程由電視台註明「現場直播」。

派彩[編輯]

先從投注彩池中派出所有四至七獎,然後再扣出金多寶累積。剩餘彩池按 45%:15%:40% 比例分成頭、二、三獎彩池,畀中獎人平分。如果頭、或二、三獎無人中,彩池會撥入累積彩池。一般嚟講,頭獎彩池包括之前嘅累積多寶;如果呢期屬金多寶搞珠,累積多寶會計算入金多寶當中(舉例:若果累積多寶少過金多寶,頭獎彩池嘅多寶仍然係原定金多寶數額;如果累積多寶多過金多寶,頭獎彩池嘅多寶會等同多寶個數)。喺以上情況下,任何剩餘嘅多寶會撥入金多寶基金。

對中組合 派彩 中獎機會
頭獎 6個數字 每注均分頭獎彩池:
投注彩池派出四至七獎及金多寶後嘅45%,加任何累積彩池,或同時包括金多寶,每注最少派港幣$8,000,000
\frac{1}{{49 \choose 6}} = \frac{1}{13,983,816}
二獎 5個數字 + 特別號碼 每注均分二獎彩池:
投注彩池派出四至七獎及金多寶後嘅15%,每注最少派港幣 $38,400
\frac{{6 \choose 5}}{{49 \choose 6}} = \frac{1}{2,330,636}
三獎 5個數字 每注均分三獎彩池:
投注彩池派出四至七獎及金多寶後嘅40%,每注最少派港幣 $19,200
\frac{{6 \choose 5}{42 \choose 1}}{{49 \choose 6}}\approx\frac{1}{55,491.3}
四獎 4個數字 + 特別號碼 每注派港幣 $9,600 \frac{{6 \choose 4}{42 \choose 1}}{{49 \choose 6}}\approx\frac{1}{22,196.5}
五獎 4個數字 每注派港幣 $640 \frac{{6 \choose 4}{42 \choose 2}}{{49 \choose 6}}\approx\frac{1}{1,082.76}
六獎 3個數字 + 特別號碼 每注派港幣 $320 \frac{{6 \choose 3}{42 \choose 2}}{{49 \choose 6}}\approx\frac{1}{812.07}
七獎 3個數字 每注派港幣 $40 \frac{{6 \choose 3}{42 \choose 3}}{{49 \choose 6}}\approx\frac{1}{60.905}
  • 每注單式投注,或複式、胆拖中獎組合只可以中獎一次。

而根據六合彩獎券規例3.16有關獎金基金會喺必要時重新分配:

  1. 若果四獎、五獎、六獎及七獎獎金加埋總額超過獎金基金60%,將由金多寶彩池撥支畀四獎、五獎、六獎及七獎獎金所款項之餘額。
  2. 若果獎金基金60%嘅款額,加上金多寶彩池現存總額,仍然派唔晒全部四獎、五獎、六獎及七獎獎金款額,四獎、五獎、六獎及七獎嘅所有獎金將同時按比例調低。而四獎獎金要係五獎獎金嘅15倍,五獎獎金要係六獎獎金嘅2倍,六獎獎金要係七獎獎金嘅8倍。之後,每一獎金必須調低至同注項單位最接近嘅整數倍數。
  3. 若果獎金基金扣除金多寶扣數及支付四獎、五獎、六獎及七獎獎金後,其餘額唔夠派頭獎、二獎及三獎獎金嘅最低款額,差額部份將由金多寶彩池撥支。而頭獎、二獎及三獎獎金應調低至同注項單位最接近嘅整數倍數。
  4. 若果獎金基金及金多寶彩池扣除預計派出四獎、五獎、六獎及七獎獎金所需嘅錢之後,唔夠派出頭獎、二獎及三獎獎金嘅最低款額,所有獎金會同時按比例調低。而頭獎獎金要係二獎獎金嘅兩倍,二獎獎金要係三獎獎金嘅2倍,三獎獎金要係四獎獎金嘅2倍,四獎獎金要係五獎獎生嘅15倍,五獎獎金要係六獎獎金嘅兩倍,六獎獎金要係七獎獎金嘅8倍。如有必要,所有獎金都應調低至同注項單位最接近嘅整數倍數,任何因此而產生嘅餘款會撥返金多寶彩池。

演變[編輯]

  • 1976年訂立以36揀6嘅六合彩
  • 1983年由36個數字增加至40個
  • 1988年增加至42個數字
  • 1990年增加至45個數字
  • 1996年增加至47個數字
  • 2002年增加至49個數字,增設七獎,並取消頭獎累積獎金上限
  • 2010年11月9號固定獎金提高一倍,頭獎獎金保證增至800萬,每注金額提高一倍至10蚊

早期嘅六合彩每個禮拜攪珠兩次,其後響某年暑假試驗星期六進行攪珠,如今每逢星期二、四、六(日)舉行三次六合彩攪珠

領獎[編輯]

用現金投注:

喺攪珠當日起計60日內領獎

  • 中獎少過100萬(包括四獎至七獎):可以喺各場外投注處或馬場領獎;
  • 中獎多過100萬:須前往跑馬地體育道一號馬會總部領獎;
  • 中獎多過500萬嘅頭或二獎:須於攪珠後60日內,致電1817登記。

用投注戶口投注(六合彩固定投注指示例外)

  • 中獎少過500萬:自動派彩
  • 中獎多過500萬嘅頭或二獎:須於攪珠後60日內,致電1817登記;為提供更佳顧客服務,馬會顧客服務部會於攪珠後第二日,根據投注戶口持有人填報嘅資料,聯絡中獎者登記,但中獎者亦應主動登記。

用投注戶口「六合彩固定投注指示」投注:

  • 無論中獎金額幾多,都會獲自動派彩。

派彩紀錄[編輯]

  • 最高嘅頭獎派彩紀錄,出現喺2013年12月10號,一注獨得港幣90,951,590元頭獎。
  • 最低嘅頭獎派彩紀錄,出現喺2001年10月30號,共28注中,每注派大概港幣18萬[1]。嗰期攪珠號碼為12、18、22、28、32、38,特別號碼29。
  • 最多人中頭獎嘅紀錄,出現在1997年7月5號香港回歸金多寶攪珠,共39注中,每注派港幣70幾萬。嗰期攪珠號碼係1、4、7、9、17、18,特別號碼40。

減緩賭博危害[編輯]

為咗減緩因賭博帶嚟嘅個人、家庭同社會問題,香港政府規定,響香港賽馬會嘅六合彩投注場所同網站上都必須展示有關戒賭熱線(+852)183-4633同輔導及治療中心(例如錫安社會服務處- 勗勵軒明愛展晴中心東華三院平和坊)嘅資料。香港賽馬會提倡「有節制博彩」,認為博彩只可以作為社交消遣嘅娛樂,並撥款畀政府成立嘅平和基金,協助沉迷賭博嘅問題賭徒戒賭。香港賽馬會同時嚴禁未滿18歲人士參與博彩活動。

[編輯]

睇埋[編輯]

出面網頁[編輯]