楊怡

出自維基百科,自由嘅百科全書
跳去: 定向搵嘢

楊怡英文Tavia Yeung Yi1979年8月30號—)係香港女演員,鄉下喺廣東湛江,而家係無綫電視嘅當紅花旦。楊怡憑住劇集《智勇新警界》喺《2003年萬千星輝賀台慶》贏到「本年度我最喜愛的飛躍進步女藝員」,之後又憑住劇集《宮心計》喺《2009年萬千星輝頒獎典禮》贏到「我最喜愛的電視女角色」。

簡歷[編輯]

楊怡自細喺沙田沙角邨度大。兩歲嗰陣親生阿爸過身,阿媽喺佢7歲嗰時改嫁;家姐楊卓娜都係無綫電視藝員。中學喺馬鞍山潮州會館中學讀,直到1999年中五畢業之後,就入咗無綫電視第13期無綫電視藝員訓練班[1]

訓練班畢業之後,佢試過喺《萬千星輝賀台慶》入面做歡樂小姐,同埋喺幾套電視劇入面做茄喱啡。第一次拍電視劇,就係喺《狀王宋世傑》入面做一個冇對白嘅師姑。去到2001年,因為佢個樣好似當時無綫嘅一線花旦張可頤,於是監製就被安排佢喺《婚前昏後》入面做佢個妹孫慶欣,觀眾先開始留意佢[1][2]

2003年,入咗行4年嘅楊怡終於憑住《智勇新警界》入面嘅「wet妹」角色溫嘉莉贏咗當年嘅「我最喜愛的飛躍進步女新人獎」。之後,佢有得喺《大唐雙龍傳》、《學警雄心》、《滙通天下》、《賭場風雲》、《溏心風暴》同《建築有情天》等等嘅電視劇演出。

到咗2008年,楊怡喺《溏心風暴之家好月圓》中演「攞女」孫皓月一角[3],憑住呢套劇攞到2008年萬千星輝頒獎典禮「最佳女配角」。第二年,楊怡喺古裝劇《宮心計》入面第一次演反角姚金鈴[4],重成為2009年萬千星輝頒獎典禮「最佳女主角」大熱門之一。

喺2009年萬千星輝頒獎典禮,楊怡就憑住《宮心計》中姚金鈴一角,攞到「我最喜愛的電視女角色」,同時重贏埋無綫頒出嘅「最佳表現獎」。但係,頒獎典禮之後,有啲網民認為楊怡冇資格攞「我最喜愛的電視女角色」,惹嚟一啲Fans狂插賽果唔公平[5]

參考[編輯]

  1. 1.0 1.1 面對面:有味白開水 楊怡《Face》2009年12月16號。
  2. 豪語錄:To be, or not to be 楊怡,《壹週刊》2008-10-09
  3. 楊怡「攞女」帶挈賺首期,Yahoo!新聞。2008年9月13日,娛樂新聞。
  4. 楊怡爭視后阿佘被拋離,太陽報。2009年11月30日,娛樂新聞。
  5. 「無綫捨阿佘谷新寵上位楊怡戲渣奪兩獎不服眾」,蘋果日報 2009-12-06

出面網頁[編輯]

代言產品[編輯]



前任:
胡杏兒
萬千星輝頒獎典禮飛躍進步女藝員
2003年
繼任:
楊思琦
前任:
陳法拉
萬千星輝頒獎典禮最佳女配角
2008年
繼任:
謝雪心