殺人十八甫
古仔[編輯]
尚可喜入侵廣州[編輯]
清朝初期（17世紀中），平南王尚可喜帶清兵打廣州，結果畀民眾猛咁爆佢頭。尤其係清兵到咗家陣廣州市天河區龍眼洞時，遇到嘅抵抗令佢哋死咗好多兵將。當佢哋兵臨大北門時，又畀守城武裝打到損兵折將，最後好艱難先攻陷廣州，因爲損失慘重，尙可喜激到生蝦噉跳，想報復廣州，於是落令屠城3日，從西門口開始，殺夠十八鋪路爲止。
度橋救人[編輯]
當時王府入面有個官叫王湘泉，聽到殺人十八鋪，嚇親：「1鋪=10里，18鋪=180里路，都唔知要死幾多人。」後來佢
裝咗18嚿有「鋪」字嘅牌[編輯]
王湘泉度咗條噉嘅橋，就嗌兩隻兵仔來，整咗十幾嚿木牌，從「第一鋪」開始一路寫到「第十八鋪」，趁啲人瞓覺唔多覺時安啲牌。佢哋響家陣六脈渠嘅第一津開始，計做「第一鋪」，過咗條街安「第二鋪」，又過廿卅米，安「第三鋪」，屈個彎，裝「第四鋪」，之後安到「第九鋪」時，發覺條街鬼噉長，驚清兵殺殺下發覺咗，於是以六脈渠爲界，分成「上九鋪」「下九鋪」，就來天光時，裝曬所有木牌。
清兵殺人[編輯]
遞日，啲清兵就奉命去殺十八鋪路嘅人，因為佢哋唔知十八鋪路究竟係點，就按住啲木牌一路殺人。當時好多人知道清兵殺到埋來，於是匿曬喺六脈渠，咁啱落咗場暴雨，渠水暴漲，浸死曬啲人，所以有講「殺人十八甫、填屍六脈渠」。
去金字邊[編輯]
後來，住響呢十八鋪嘅人驚清軍發覺有警轟，於是靜鷄鷄去咗「鋪」字嘅金字邊，變做「甫」，變成咗「十八甫」。
十八甫地名攷釋[編輯]
呢個古仔點講都好亦就係個古仔，至於「十八甫」嘅「甫」係咩意思，有下面幾個講法：
百越詞[編輯]
有人話，「甫」字其實係源自百越話嘅詞，而家廣東地名入面，諸如「甫」、「布」、「埔」、「圃」、「浦」呢啲詞都係百越話嘅寫音，呢個詞嘅意思係「村」噉解。比如從化江浦、廣州嘅黃埔、東圃，呢啲地名嘅尾字都係「村」噉解。
不過有人質疑，比如話而家光復中路係六七八甫所在，嗰度先595米長，點容納到3條村[2]？
舖頭[編輯]
喺明朝嘅史料入面，呢啲「甫」又寫「舖」。自明朝開始，西關嘅商舖就好多，集中嘅地方就嗌做「舖」，後來個「舖」字寫成「甫」。
商人自衞組織[編輯]
就話明朝時，廣州同佛山嘅商人爲咗防賊，成立咗商人自衞組織，就嗌做「舖」，「十八甫」就係話呢度曾經有18個商人自衞組織。
碼頭[編輯]
呢種講法認爲「甫」嘅原字係「埗」，因爲廣州有「甫」嘅地名，往往附近都會有嗌做「水腳」嘅。比如民國三十七年《廣州市街道詳圖》就有三甫水腳紀錄，清朝《廣州城坊誌》亦有第六、八、十四甫水腳嘅記載，直到而家，中山七路都有四甫水腳。
兼且廣州無第一甫，得第一津，有人話呢個名嘅意思就係「第一甫通津」，津係指大碼頭，而甫係細碼頭。十八甫原名蜆子埗[2]。
平地[編輯]
廣東人將平坦嘅荒地嗌做「埔」，「埔」係「甫」嘅原字，十七個甫係話第一津之後十七處平地。
依家有「甫」字嘅地名[編輯]
從清初開始，第一津到第十八甫嘅地名用到而家，其中上下九係好出名嘅商業步行街。
俗話[編輯]
廣州人有句俗話：第一津——冇譜。就係話十八甫之中唯有第一唔嗌甫。
重有句俗語咁講：人好你話好，唔識花共草，行到第一津，完全冇嗮甫。
參攷[編輯]
- 俗話廣州 廣州出版社 ISBN 7-80655-150-6/K·18
- 俗話廣州 粵語協會
- 廣州人知道 十八「甫」，甫字的由來嗎~？ 開心網
- 十八甫的傳說 廣州圖書館
- 「十八甫」的由來（廣州市） 廣東文化網
註[編輯]
- ↑ 《「庚寅之劫」——1650年廣州大屠殺》 互聯網檔案館嘅歸檔，歸檔日期2010年11月30號，.，大洋網，2010年7月13日。
- ↑ 2.0 2.1 〈羊城網：淺談廣州第一津至十八甫〉. 原著喺2016-03-05歸檔. 喺2014-05-08搵到.