烏克蘭世界遺產一覽

出自維基百科，自由嘅百科全書

烏克蘭世界遺產一覽列舉咗位於烏克蘭、受聯合國教科文組織承認嘅世界遺產嘅資料。

直到2024年3月，烏克蘭一共有八項世界遺產。其中七項係文化遺產，淨返嗰項係自然遺產[1]。八項遺產入面有三項係跨國遺產，包括斯特魯維測地弧、原始山毛櫸林、同木質教堂。烏克蘭第一項世界遺產，係1990年入選嘅「基輔：聖．索菲婭教堂和佩喬爾斯克修道院」。不過，受俄羅斯入侵烏克蘭威脅，呢項世界遺產要同另外兩項一齊列入世界遺產瀕危名錄[2]。

背景[編輯]

根據1972年制定嘅《保護世界文化和自然遺產公約》（即係《世界遺產公約》），世界遺產係指對全人類都有重要嘅文化或者自然價值嘅遺產項目。由締約國提名嘅文化或者自然遺產，經過聯合國教科文組織核准就會成為世界遺產[3]。1991年之前仲係蘇聯加盟共和國嘅烏克蘭，喺1988年10月12號已經正式簽署咗公約[1]。「基輔：聖．索菲婭教堂和佩喬爾斯克修道院」亦喺1990年入選，成為烏克蘭第一項世界遺產[4]。

文化遺產，講嘅係古蹟（好似建築、雕塑、銘文噉）、建築群、同遺址（譬如考古遺址）等等。而自然遺產，就係喺科學、保育、或者自然美角度嚟睇，好有價值嘅自然地貌或者自然地理結構（例如瀕危動植物棲息地之類）[5]。呢啲遺產要符合教科文組織畀嘅十項入選準則入面至少一項，先可以列入世界遺產名錄。

世界遺產入選準則[6]
文 文化遺產 自 自然遺產
(ⅰ) 表現人類創造力嘅經典之作 (ⅶ) 包含出色嘅自然美景同美學重要性嘅自然現象或者地區
(ⅱ) 喺某個時期或者文化圈裏面，對建築、技術、紀念藝術、城鎮規劃、或者景觀設計嘅發展有巨大影響，促進人類價值嘅交流 (ⅷ) 代表生命進化嘅紀錄、重要嘅持續地質發展過程、重要嘅地形學或者地文學特色等等，地球歷史主要發展階段嘅顯著例子
(ⅲ) 呈現到現存或者消失咗嘅文化傳統或者文明嘅獨特或者稀有證據 (ⅸ) 喺陸地、淡水、沿海同海洋生態系統，同動植物群嘅演化同發展上，代表持續進行緊嘅生態學同生物學過程嘅顯著例子
(ⅳ) 呈現到人類歷史重要階段嘅建築類型、技術組合、或者景觀嘅卓越典範 (ⅹ) 最重要同顯著生物多樣性嘅自然生態棲息地，包含住喺保育或者科學角度上，符合普世價值嘅瀕危物種
(ⅴ) 某個文化嘅人類傳統聚落或者土地使用嘅出色典範－特別係因為難以抗拒嘅歷史潮流而容易消失嗰啲
(ⅵ) 同具有顯著普世價值嘅事件、生活傳統、理念、信仰、藝術或者文學作品，有直接或者實質嘅連結（世界遺產委員會認為呢項準則最好同其他準則一齊用）

世界遺產[編輯]

圖例
  跨國世界遺產
  瀕危世界遺產

文 文化遺產
自 自然遺產

名 [註 1] 相 所在地 入選
年份 		入選
準則 		簡介
基輔：聖．索菲婭教堂和佩喬爾斯克修道院 [a]

編號527ter

基輔 1990 文：
(ⅰ) (ⅱ) (ⅲ) (ⅳ) 		基輔羅斯大公弗拉基米爾大帝喺988年受洗，象徵住福音傳到入東歐，好多地方因而基督化。基輔基督公國就係喺噉嘅背景之下，喺十一世紀建立。佢嘅首都基輔有「新君士坦丁堡」嘅美稱，而基輔嘅聖蘇菲亞大教堂亦都可以同君士坦丁堡嗰個媲美。至於基輔嘅洞窟修道院，亦喺精神同文化層面上，對東正教喺十七到十九世紀傳入俄羅斯地區貢獻良多[4]。

受到俄羅斯嘅入侵行動影響，呢項世界遺產喺2023年列咗入瀕危名單[2]。

里沃夫歷史中心 [b]

編號865bis

利維夫州 1998 文：
(ⅱ) (ⅴ) 		利維夫喺中世紀晚期建立，幾個世紀以嚟佢都係繁榮嘅行政、宗教、同商業中心。中世紀嘅城市面貌，連埋精美嘅巴洛克同後期建築，近乎完美噉樣保留咗落嚟。由利維夫歷史城區呢啲保存完整嘅建築物之中，甚至可以睇得出當時嘅利維夫呢度究竟住咗邊啲唔同嘅種族群體[7]。

受到俄羅斯嘅入侵行動影響，呢項世界遺產喺2023年列咗入瀕危名單[2]。

斯特魯維地理探測弧線 [c]

編號1187

赫梅利尼茨基州、敖德薩州，同另外九個國家 2005 文：
(ⅱ) (ⅲ) (ⅵ) 		斯特魯維測地弧係一條三角測量鏈，佢由挪威到黑海一共穿越十個國家，全長2820公里。呢條測地弧係天文學家 Friedrich Georg Wilhelm Struve 喺1816到1855年間用到嘅測量點，代表住人類第一次精確噉量度到子午綫嘅長度。呢次測量唔單只係地球科學同繪圖學發展嘅重要一步，仲見證咗幾個國家嘅君主為科學而合作。測地弧本來有265個測量站，世界遺產收錄咗其中34個，烏克蘭佔4個[8]。
喀爾巴阡山脈及歐洲其它地區的原始山毛櫸林 [d]

編號1133ter

伊萬諾-弗蘭科夫斯克州、赫梅利尼茨基州、利維夫州、外喀爾巴阡州，同另外十七個國家 2007 自：
(ⅸ) 		呢項跨國世界遺產包括咗十八個國家，一共93個組成部分。歐洲山毛櫸本來只係喺阿爾卑斯山、喀爾巴阡山脈、地中海、同庇里牛斯山嘅一啲偏遠地區先有。但自從上一個冰河時期完咗，佢喺短短幾千年間就蔓延開去，佔據咗成個歐洲大陸。歐洲山毛櫸嘅成功擴展，證明呢種樹對氣候同地理條件嘅適應力同耐受性。而世界遺產地包括嘅，就係未受干擾嘅溫帶森林之中嘅傑出範例[9]。
布科維納與達爾馬提亞的城市民居 [e]

編號1330

切爾諾夫策州 2011 文：
(ⅱ) (ⅲ) (ⅳ) 		由捷克建築師 Josef Hlavka 喺1864到1882年間起成嘅呢項世界遺產，代表住唔同建築風格嘅巧妙結合。作為十九世紀歷史主義建築嘅典範，呢棟建築最顯眼嘅莫過於十字形嘅圓頂教堂。連埋隔籬嘅神學院、修道院、花園、同公園，呢座建築群體現咗拜占庭時期以嚟各式建築風格嘅影響。佢同時仲顯示出東正教會喺哈布斯堡王朝統治底下嘅影響力，印證住奧匈帝國寬容嘅宗教政策[10]。
Ancient City of Tauric Chersonese and its Chora [f]

編號1411

塞凡堡 2013 文：
(ⅱ) (ⅴ) 		呢項世界遺產包括咗古希臘多利安人喺黑海北岸建立嘅城市遺址，同埋城郊嗰幾百塊大細一致嘅農地。呢一帶係三世紀黑海周邊嘅酒業中心，啲農地以前就係種提子嘅。座城曾經係希臘、羅馬、同拜占庭同黑海北岸嘅人交流嘅中心，喺十五世紀之前都仲蓬勃發展緊。遺址入面有公共建築同住宅、早期基督教遺蹟、羅馬同中古時代嘅防禦同供水系統等等。呢項遺產係古代城邦民主土地制度嘅範例[11]。
Wooden Tserkvas of the Carpathian Region in Poland and Ukraine [g]

編號1424

伊萬諾-弗蘭科夫斯克州、利維夫州、外喀爾巴阡州，同波蘭 2013 文：
(ⅲ) (ⅳ) 		呢項位於中歐東邊嘅跨國世界遺產，由十六座木質教堂組成。呢啲教堂係東正教同希臘禮天主教徒喺十六到十九世紀，用打橫嘅原木嚟起嘅。木教堂嘅設計一開為三，頂部係四方或者八角嘅穹頂，唔單只糅合咗東正教同當地傳統建築嘅元素，仲象徵住呢啲教徒嘅宇宙觀。呢啲教堂嘅重要組件包括聖像屏風、室内彩飾等等陳設，有啲仲會有木製嘅鐘樓、門樓、同墓地[12]。
The Historic Centre of Odesa [h]

編號1703

敖德薩州 2023 文：
(ⅰ) (ⅱ) (ⅲ) (ⅳ) (ⅴ) 		遵照古典主義規劃嘅敖德薩歷史城區，遍佈住兩到四層樓高嘅建築同綠樹成蔭嘅大道，係黑海港埠敖德薩嘅一部分。世界遺產範圍包括咗主要由意籍建築師設計嘅各式建築，有劇院、大橋、宗教場所、酒店、銀行、政府建築等等，反映住敖德薩十九到二十世紀初嘅繁榮興盛。呢啲折衷主義建築見證咗敖德薩呢座多元城市嘅發展，係十九世紀東歐城市唔同民族、唔同宗教之間文化交流嘅典範[13]。

受到俄羅斯嘅入侵行動影響，呢項世界遺產喺2023年列咗入瀕危名單[14]。

註[編輯]

  1. ↑ 每項世界遺產都有註腳，列明粵文譯名同烏克蘭原文名。直到2024年3月，聯合國教科文組織仲未幫所有遺產改嗮中文名。
  1. ↑ 粵譯：基輔：聖蘇菲亞大教堂同洞窟修道院
    烏克蘭文：Київ: собор святої Софії та прилеглі чернечі будівлі, Києво-Печерська лавра
  2. ↑ 粵譯：利維夫歷史城區
    烏克蘭文：Львів — ансамбль історичного центру
  3. ↑ 粵譯：斯特魯維測地弧
    烏克蘭文：Геодезична дуга Струве
  4. ↑ 粵譯：喀爾巴阡山脈同歐洲其他地方嘅原始山毛櫸林
    烏克蘭文：Первісні букові ліси Карпат та інших регіонів Європи
  5. ↑ 粵譯：布科維納同達爾馬提亞嘅城市民居
    烏克蘭文：Резиденція митрополитів Буковини та Далмації
  6. ↑ 粵譯：赫爾松尼蘇斯古城同城郊
    烏克蘭文：Стародавнє місто Херсонес Таврійський і його хора
  7. ↑ 粵譯：波蘭同烏克蘭喀爾巴阡地區嘅木質教堂
    烏克蘭文：Дерев'яні церкви карпатського регіону в Польщі та Україні
  8. ↑ 粵譯：敖德薩歷史城區
    烏克蘭文：Історичний центр Одеси

參考[編輯]

  1. ↑ 1.0 1.1 "Ukraine". UNESCO World Heritage Centre (英文). 原先內容歸檔喺2021-05-12. 喺2024-03-31搵到.
  2. ↑ 2.0 2.1 2.2 "Ukraine: UNESCO sites of Kyiv and L'viv are inscribed on the List of World Heritage in Danger". UNESCO World Heritage Centre (英文). 2023年9月15號. 原先內容歸檔喺2023-09-17. 喺2024-03-31搵到.
  3. ↑ "The World Heritage Convention". UNESCO World Heritage Centre (英文). 原先內容歸檔喺2016-08-27. 喺2024-03-31搵到.
  4. ↑ 4.0 4.1 "Kyiv: Saint-Sophia Cathedral and Related Monastic Buildings, Kyiv-Pechersk Lavra". UNESCO World Heritage Centre (英文、中國中文). 原先內容歸檔喺2021-05-12. 喺2024-03-31搵到.
  5. ↑ "Convention Concerning the Protection of the World Cultural and Natural Heritage". UNESCO World Heritage Centre (英文). 原先內容歸檔喺2021-02-01. 喺2024-03-31搵到.
  6. ↑ "The Criteria for Selection". UNESCO World Heritage Centre (英文). 原先內容歸檔喺2016-06-12. 喺2024-03-31搵到.
  7. ↑ "L'viv – the Ensemble of the Historic Centre". UNESCO World Heritage Centre (英文、中國中文). 原先內容歸檔喺2021-05-16. 喺2024-03-31搵到.
  8. ↑ "Struve Geodetic Arc". UNESCO World Heritage Centre (英文、中國中文). 原先內容歸檔喺2005-10-30. 喺2024-03-31搵到.
  9. ↑ "Ancient and Primeval Beech Forests of the Carpathians and Other Regions of Europe". UNESCO World Heritage Centre (英文、中國中文). 原先內容歸檔喺2012-03-02. 喺2024-03-31搵到.
  10. ↑ "Residence of Bukovinian and Dalmatian Metropolitans". UNESCO World Heritage Centre (英文、中國中文). 原先內容歸檔喺2021-05-19. 喺2024-03-31搵到.
  11. ↑ "Ancient City of Tauric Chersonese and its Chora". UNESCO World Heritage Centre (英文). 原先內容歸檔喺2021-05-16. 喺2024-03-31搵到.
  12. ↑ "Wooden Tserkvas of the Carpathian Region in Poland and Ukraine". UNESCO World Heritage Centre (英文). 原先內容歸檔喺2020-10-27. 喺2024-03-31搵到.
  13. ↑ "The Historic Centre of Odesa". UNESCO World Heritage Centre (英文). 原先內容歸檔喺2023-01-25. 喺2024-03-31搵到.
  14. ↑ "Odesa inscribed on UNESCO's World Heritage List in the face of threats of destruction". UNESCO World Heritage Centre (英文). 2023年1月25號. 原先內容歸檔喺2023-01-25. 喺2024-03-31搵到.
由「https://zh-yue.wikipedia.org/w/index.php?title=烏克蘭世界遺產一覽&oldid=2120238」收