環法單車賽

出自維基百科,自由嘅百科全書

環法單車賽法文le Tour de France)係一項一年一度嘅大型公路單車比賽。通常每年7月舉行,每年比賽路線唔一定同上年相同,不過大約都係環繞法國一個圈,有時會出入周邊嘅國家[1]。同「環意單車賽」以及「環西班牙單車賽」一齊被稱為「大滿貫」(Grand Tours)[2]

比賽分成多個賽段,每一個賽段都係由一個城鎮到下一個城鎮,每一段分別計時排名。所有賽段成績累計決定每一位參賽選手嘅總成績。賽段冠軍會着住黄色單車衫,直至有其他選手超越佢嘅成績為止[1][3]

參賽選手會組隊參賽。每一隊由9名選手組成,共有20-22個小隊。只有得到賽會邀請嘅單車隊先有得參賽。傳統上,只有一流嘅專業車隊先有可能收到參賽邀請。近年來,大賽組織者採用國際單車總會Union Cycliste Internationale)嘅計分系統嚟決定參賽隊伍。每個車隊通常由佢哋嘅最大贊助商命名。比賽時,各車隊會採取戰術、隊友之間會互相幫助,通常車隊後面會有一部支援車跟住佢哋[4][5]

2004年一眾環法單車賽選手喺香榭麗舍大道上飛馳

簡介[編輯]

2008年比賽路線

環法單車賽分開一個一個賽段,每一段大概持續一日,每段單獨計時,以時間最短為之贏。

各段時間累積而得到嘅排名係總排名,所有賽段累計時間最短嘅會成為總冠軍。除咗總排名以外,環法單車賽亦有其他項目嘅排名方式,比如登山排名或者衝刺排名,各項排名嘅領先者都會有特定嘅單車衫。例如綠衫(Green Jerseys)係衝刺冠軍(Sprinter)、白底紅點衫係登山冠軍(Climber)、白衫係表現最好嘅26歲以下參賽選手(Youngster)[1][6]

由於總排名係總結所有賽段時間得出嚟嘅結果,於是有可能出現「總冠軍一個賽段都無贏過」嘅奇怪現象,例如1990年美國環法冠軍選手勒蒙(Greg LeMond)就係咁。

雖然每年路線都唔同,但係比賽一般有20個賽段,全長大約3000到4000公里(約莫1800到2500英里)。歷史上最短嘅一次係1904年,全程只有2420公里。最長嘅賽程係1926年,有5745公里。而家嘅環法單車賽通常以香榭麗舍大道為終點[7][8]

歷史上,由1930年至1961年之間,以及1967年至1968年之間,環法單車賽主辦單位曾經以維護比賽純潔性為由,規定參賽選者必須以國家組隊。但係現今幾乎所有參賽選手都屬於有商業贊助背景嘅單車隊。

比賽基本上係喺公路上進行,有平路、有坡道、有時亦會路過城鎮中嘅石板路或鄉郊嘅泥土路。大部分賽程,全部選手同時出發,但係個人計時賽以及團體計時賽,就個人或團體一個一個分別出發。

歷史[編輯]

環法單車賽始於1903年,一般每年夏季7月初舉辦。環法單車賽同法國歷史上嘅「德雷福斯事件」有多少關係。阿爾法·德雷福斯係一個猶太裔嘅法國軍人,1894年被誣告叛國入獄。雖然兩年後真相大白,但係法國政府唔肯認錯。事件公開後,法國社會開始正視反猶太主義,並引發一場大規模爭論。爭論中,有啲主張德雷福斯罪有應得嘅報界人士同埋廣告商唔滿意當時法國最大嘅體育報紙《Le Vélo》嘅立場,於是決定另外搞一本雜誌抗衡。新雜誌叫《L'Auto》,係當今法國《隊報》(L'Équipe)嘅前身。第一場環法單車賽就係L'Auto為咗推銷,喺1903年開辦嘅。本來打算由巴黎經里昂馬賽波爾多等地方然後折返巴黎,係一個為期5星期嘅比賽(由5月31號到7月5號),結果只有15人報名[9][10]。L'Auto編輯德格朗日(Desgrange)於是將賽程改為19號,並向參賽者發放補貼[11][12][13][13],最後有60人報名。當時環法單車賽只有6個賽段,每段平均400公里,有時一個賽段由朝早踩到半夜。咁苛刻嘅比賽竟然吸引咗公眾注意力。報紙亦都因此得益,發行量日漸上升[14]

環法單車賽曾經喺1915-1918年同埋1940-1946年因為兩次大戰而停辦[15]。另外1939年嘅比賽亦無德國、意大利同埋西班牙嘅選手參賽。環法單車賽目前由Société du Tour de France主辦。呢個組織係一個屬於Amaury Sport Organisation(ASO)嘅分部。而ASO又屬於一個包括《隊報》在內嘅媒體集團[16]

獎金[編輯]

一開始,每屆環法單車賽都頒發獎金。1903年第一屆總獎金20,000法國法郎,自此後每年都有增長,2008年達到320萬歐元(約500萬美元)。除總決賽外,每一賽段以及每個一排名都有額外嘉獎(bonus)。每一參賽隊伍都會得到一小筆出場費(睇2008年環法單車賽英文文章)。

傳統上,作為大賽冠軍嘅車隊主將會將比賽嘅獎金分發各隊友,因為佢哋自己通常已經有其他收入(例如廣告)。

常見戰術[編輯]

環法單車賽裏面嘅參賽車隊同其他隊際公路單車賽嘅參賽車隊一樣。車隊隊員各有明確嘅分工:每隊往往有一個有可能爭成績嘅主將(leader),其他隊員就做勤務(domestique)兼護航。勤務主要為主將服務,例如幫手帶水同嘢食。大部分時間,佢哋為主將開路。一般情況下,勤務係唔會有機會喺比賽裏面爭取名次嘅。

比賽當中,各選手往往彼此貼得好近,形成一個主車群(peloton), 利用前面選手形成嘅擋風(drafting)嚟幫後面嘅選手減少阻力同保持體力。

有時,有啲車隊或者個選手決定出擊(attack):突然加速,拉開同車群嘅距離(breakaway)。如果佢哋嘅對手唔想俾佢哋拉開,可能會派一兩個勤務(或加速帶動整個車群)跟上(chase)出擊者。去到賽段最後期,所有勤務可能都已經筋疲力竭,呢個時候主將先至衝出陣營做作最後衝刺。

賽段選址[編輯]

成為一個賽段嘅開始站通常會帶嚟遊客同生意,為此,入選嘅城鎮要向大賽主辦單位畀有關費用。據報道,2008年,有啲賽段起始城市要畀41,000美元,終止城市73,000美元[17]

著名賽段 出名之處
香榭麗舍大道 現代環法單車賽最後一個賽段。大賽嘅頒獎儀式亦喺呢度搞。頒獎台亦總會以凱旋門為背景。
阿爾杜維茲
Alpe d'Huez
位於法國東南部阿爾卑斯山嘅一個滑雪場,山勢險峻,山高約1860米。上山公路有21個轉彎位。各選手要喺14公里內爬高約1000米,平均坡度係7.9%。每年夏季吸引成千個業餘愛好者一試身手。
蒙望圖
Mont Ventoux
位於法國東南部普羅旺斯地區嘅一個山,山高約1912米,又稱「普羅旺斯的巨人」。呢座山以風大著稱,山頂風速最高紀錄達每小時320公里。山頭寸草不生,所以又名「禿頂山」。上山嘅路平均坡度係7.2%。

傳奇人物[編輯]

國籍 成績
蘭斯·阿姆斯壯 美國 美國 癌症康復者;1999-2005年連奪七次環法單車賽總冠軍;但係呢個記錄已經因為禁藥風波而畀UCI褫奪[18]
班納·伊諾(Bernard Hinault  法國 分別五次獲得環法總排名冠軍(1978、1979、1981、1982、1985)。
米高·因多爾倫(Miguel Indurain 西班牙 西班牙 環法單車賽史上第一個連奪五次總冠軍(1991-1995)嘅選手。因身材高大,外號「大米格」
艾迪·默爾克(Eddy Merckx  比利時 被認為係史上最偉大嘅公路單車選手:分別五次奪得環法總排名冠軍,共贏過34個賽段,着過黃衫96日。另外五次環意單車賽冠軍,一次環西班牙單車賽冠軍。三次世界錦標賽冠軍。第一次參加環法,就一舉奪得三個排名第一(總排名、山地、衝刺)。默爾克經常用進攻型騎法嚟消耗對手嘅體力,因此外號「食人生番」。

體能挑戰[編輯]

僅憑能量消耗嚟講,公路單車比賽遠遠高過大多數體育項目,一般人踩單車嗰時,身體產生大概150-200瓦特嘅功率,而單車選手比賽時候嘅功率大概有400瓦特。一個環法賽選手平均每日消耗8,000到9,000卡路里[19]

禁藥問題[編輯]

環法單車賽係一個相當艱苦嘅多日賽事,只有少數優秀選手能夠脱穎而出,而呢啲選手當中亦只有一部分叫做搵到錢。參賽選手為咗各種原因而服食各類藥物,令環法單車賽一直俾禁藥嘅問題困擾。

最初,參賽選手食藥為咗止痛。1924年參賽選手HenriCharles Pélissier兩兄弟第一次公開坦白用藥嘅時候,佢哋提到嘅藥物包括可卡因氯仿(哥羅芳)阿士匹靈[20][21][22][23]。但係後嚟,服藥選手食藥唔係為止痛而係為提高成績。目前最常見嘅禁藥係提高心肺功能嘅興奮劑,例如紅血球形成激素(Erythropoietin,簡稱EPO),另外重有睾酮、苯丙胺(安非他命)。1969年英國選手Tom Simpson就曾經因為服食過苯丙胺喺比賽途中死亡。

1998年,環法選手(Festina車隊嘅 Willy Voet)因為攜帶多種興奮劑而被捕,法國警方之後突擊搜查幾個車隊嘅住處,又從另一個車隊(TVM)搵到禁藥證據。當年比賽進行到第17賽段嘅時候,所有選手抗議警方嘅手法。雖然經過調停後比賽繼續進行,但比賽到最後只剩得96個選手。

此後環法單車賽主辦單位同UCI加強內部嘅禁藥檢查,比如增加藥檢次數以及做針對EPO嘅新藥檢,並且同國際奧林匹克委員會合作。1999年一個獨立嘅藥檢機構「國際反興奮劑組織」(WADA)成立。但此後仍然有選手因禁藥俾主辦單位踢出環法同埋俾UCI停賽,當中亦有頂尖高手,包括蘭斯岩士唐

大事記[編輯]

  • 1903年:首屆環法大賽。
  • 1905年:取消夜間賽段;第一個山路賽段。(阿爾薩斯)
  • 1906年:第一次過境賽段(德國)。
  • 1907年:第一次喺法國境外城市舉行第一賽段:梅斯(當時係德國嘅領地)。
  • 1910年:第一次經過比利牛斯山。
  • 1911年:第一次經過阿爾卑斯山。
  • 1919年:第一次出現黃色領騎衣。
  • 1923年:開始對首先衝線嘅車手減時獎勵。
  • 1926年:第一次在外省開始環法賽事(依雲)。
  • 1928年:法國國內嘅地方組織車隊參賽。
  • 1930年:法國國家隊開始參賽,第一次出現廣告車。
  • 1933年:創立最佳山地車手獎項。
  • 1937年Jacques Goddet成為賽事主管。
  • 1947年:第一次出現全境外賽段(比利時嘅布魯塞爾到盧森堡)。
  • 1948年:喺每個賽段後嘅當日頒發黃色領騎衣。
  • 1949年:第一次經過意大利同西班牙。
  • 1951年:第一次經過Ventoux。
  • 1952年:第一次喺Alpe d'Huez舉行衝頂賽段;第一次攀登Puy de Dôme
  • 1953年:對最佳衝線車手頒發綠衫。
  • 1954年:第一次喺境外出發(阿姆斯特丹)。
  • 1962年Félix Lévitan成為賽事主管。
  • 1964年:開始允許中途換車。
  • 1967年:創立序幕賽段;最後一次喺巴黎王子公園球場結束賽事。
  • 1968年:允許車手中途休息。
  • 1970年:創立白衫,獎勵25歲以下最佳青年車手。
  • 1974年:第一次經過英國
  • 1975年:用圓點衫獎勵最佳山地車手;第一次喺香榭麗舍大道結束賽事。
  • 1987年:環法總計25個賽段,最多嘅一次:Félix Lévitan卸任。
  • 1995年:環法第14站,選手法比歐·卡薩泰利摔車身亡
  • 1998年:「菲斯蒂納醜聞」。
  • 2003年:選手必須佩戴頭盔參賽。環法單車賽100周年。
  • 2005年:蘭斯·岩士唐奪得7連冠軍。
  • 2006年:岩士唐捲入興奮劑醜聞。
  • 2012年:美國反興奮劑機構(USADA)宣布褫奪岩士唐七個環法自行車賽頭銜,並且終身禁賽。

相簿[編輯]

附註[編輯]

參考[編輯]

  1. 1.0 1.1 1.2 Joel Gunter (16 July 2012). "The Tour de France: a guide to the basics". The Telegraph. 喺30 July 2012搵到.
  2. "Million dollar, baby!". Cycling News. Future Publishing Limited. 12 January 2007. 喺21 May 2011搵到.
  3. "Regulations of the race" (PDF). ASO/letour.fr. 喺30 December 2008搵到.
  4. "Union Cycliste Internationale". Uci.ch. 喺6 August 2012搵到.
  5. When is the Criterium route announced. "UCI WorldTour calendar 2012". Cycling Weekly. 喺6 August 2012搵到.
  6. Associated, The (22 July 2012). "Bradley Wiggins completes Tour de France breakthrough". The Seattle Times. 喺30 July 2012搵到.
  7. "Tour de France 2011 – Stage by stage". Letour.fr. 喺30 July 2012搵到.
  8. "Moment 17: 1975 – TDF's First Champs Elysees Finish". Bicycling Magazine. 原著喺2011年9月5號歸檔. 喺30 July 2012搵到.
  9. Dauncey, p13
  10. Nicholson, Geoff (1991), Le Tour: the rise and rise of the Tour de France, Hodder and Stoughton, UK, ISBN 0-340-54268-3, p44
  11. USA, p28
  12. Chany, Pierre (1997) La Fabuleuse Histoire du Tour de France, La Martinière, France, ISBN 978-2-7324-2353-1, p21
  13. 13.0 13.1 Dauncey, p131
  14. "1903 Tour de France". Bikeraceinfo.com. 19 January 1903. 喺30 July 2012搵到.
  15. Barry Boys. "The Return of a Grand Affair – "New Tour Legend: the Maillot Jaune"". Cycling Revealed. 喺3 June 2009搵到.
  16. "Tour de France snubs velodrome Holocaust memorial". The Jewish Chronicle. 12 July 2012. 原著喺2012年7月18號歸檔. 喺30 July 2012搵到.
  17. "Torelli's History of the Tour de France: the 1930s or, All They Wanted To Do Was to Sell a Few More Newspapers" (HTML). BikeRaceInfo.com. 喺2007-05-27搵到.
  18. Formerly Lance Armstrong with 7 wins until he was stripped of his awards and banned for life from all UCI events following an official investigation into doping allegations against him [1].
  19. GINA KOLATA (2007年7月22號). "Just a Bike Race, You Say? Think Again". 紐約時報.
  20. Tour de France, 100 ans, 1903–2003, L'Équipe, France 2003, p149
  21. De Mondenard, Dr Jean-Pierre: "Dopage, l'imposture des performances", Chiron, France, 2000
  22. "Association of British Cycling Coaches (ABCC), Drugs and the Tour De France by Ramin Minovi". ABCC. 1 June 1965. 原著喺2007年6月27號歸檔. 喺18 July 2009搵到.
  23. Moore, Tim, "French Revolutions: Cycling the Tour de France", St Martin Press, NY 2001, p.145
  24. Spaarnestad Photo image number SFA001006411

出面網頁[編輯]