КСВК狙擊步槍
哥夫羅夫大口徑狙擊步槍（俄文：Крупнокалиберная Снайперская Винтовка Ковровская，縮寫КСВК）係一支俄羅斯研制嘅大口徑無托式重型狙擊步槍/反器材步槍，採用俄製12.7×108毫米步槍子彈。КСВК嘅主要用途係射殺敵方狙擊手、穿牆或者攻擊輕裝甲車輛。
簡史
[編輯]КСВК由總部位於哥夫羅夫市嘅謝格芝雅略夫製造廠（ОАО Завод имени В.А. Дегтярёва）喺20世紀90年代後期基於СВН-98步槍（Снайперская Винтовка Негруленко 98 года，意思係「98式尼古祿靈高狙擊步槍」）開發。СВН-98嘅槍管來自6П49 Корд重機槍，兩腳架就來自ПКМ通用機槍。由於СВН-98發射嘅係普通機槍子彈，因此精度一般。
改進之後嘅狙擊步槍一開始叫做АСВК（Армейская Снайперская Винтовка Крупнокалиберная，意思係「軍用大口徑狙擊步槍」），後來先至改名做КСВК。КСВК同СВН-98有好多共同點，喺外觀上嘅最主要區別係：КСВК裝咗重新設計過嘅槍口裝置，同埋可以摺埋嘅機械瞄準具，另外，槍托底板嘅緩衝墊亦都重新設計過。目前КСВК主要用戶係駐車臣嘅俄軍，因為КСВК可以輕易打穿木牆或者磚牆，而匿喺後面嘅車臣武裝分子，有無著避彈衣都會中彈受傷。
設計
[編輯]КСВК係一種採用無托式結構、手動槍機操作同5發可拆式彈盒供彈嘅狙擊步槍/反器材步槍。槍口配備嘅大型槍口裝置，同時具有槍口制退器同消音器嘅效能。同大部份俄羅斯槍械一樣，КСВК嘅握把上方配備咗俄羅斯標準嘅瞄準鏡導軌，可以裝各種日用或者夜用光學瞄準鏡。КСВК亦配備咗可以校高度同摺埋嘅兩腳架，同埋後備摺疊式機械瞄具，用作緊急用途。
КСВК通常採用俄製12.7×108毫米步槍子彈，而ДШК同НСВ兩種重機槍亦都用依種子彈。另外有報道話，圖拉彈藥工廠為КСВК特別研制咗一種СПБ-12.7高精度子彈。
