一樓一鳳

一樓一鳳單位門口

一樓一鳳（粵拼：yat1 lau4 yat1 fung6*2），簡稱一樓一，樓係指樓宇入面嘅獨立處所，而鳳就係指喺上述處所入面賣淫嘅妓女，係舊年代嘅香港坊間美化咁用嚟指一個樓宇單位入面只有一個妓女接客嘅生意手法；對於從事一樓一鳳嘅妓女，亦衍生咗專門為佢哋而設嘅名稱：鳳姐。

呢種賣淫方式之點解主要響香港出現，係因為香港法律只係禁止組織或者個體人士操控旗下女性進行賣淫活動，但無禁止個別女性自己一個人出嚟賣淫。

因此，除咗有啲希望借出賣肉體搵食嘅個別女性會自己出錢租用樓宇單位進行賣淫，亦有組織團體 (通常係有黑社會背景) 走法律罅，將擁有或者租返嚟嘅樓宇單位，將佢改建成為一個一個嘅獨立小單位，「租」畀旗下嘅性工作者一人一屋咁做生意，嚟規避法律責任。

不得不提一個現象，雖然話係一個單位一個鳳姐，但佢哋通常都會聚埋喺某一棟大廈嘅某一個甚至幾個樓層裡面開檔做生意，其一原因係上述啲組織團體為咗方便集中管理旗下啲鳳姐，另外啲個別鳳姐自己想喺出面隨便租用一個單位開檔亦都會遇到不少困難，性工作始終被認為係低下、污穢、有失體面嘅行業，如果隨便搵個單位開雞竇，基於多種原因，啲隔離左右嘅鄰里街坊係會有極大意見同阻力，就其係師奶力量，鳳姐生意會大受影響，甚至有人身安全問題，所以啲鳳姐聚埋一處開檔，雖然話同行如敵國，但好在一來有勢力保護，二來大家有照應；因為咁，啲雞竇集中嘅大廈樓層，啲嫖客上到去嘅話，係可以逐個門逐個門咁撳鐘仔，揀選啱心水嘅鳳姐進行性交易。