世宗特別自治市

  「世宗」跳轉到呢度。想搵發明諺文嘅世宗大王，請睇「世宗大王」。

世宗特別自治市（韓文：세종특별자치시），係大韓民國一個規劃緊嘅特別自治市，位於忠清南道燕岐郡同公州市交界處。響盧武鉉在任南韓總統期間，制定咗「行政中心城市計劃」，將世宗市規劃做實質行政首都；李明博接任總統之後因為計劃受到質疑而廢止，但係實際上，世宗市都響2012年7月正式啟用為行政首都，韓國國會等等嘅重要國家機關仍然喺首爾，而其他36個政府機構就會響2012年9月去到2014年底陸續搬去世宗，預計響2030年人口會有50萬。

名

有官員話，韓國政府將規劃緊嘅行政首都改名做「世宗」，將會有助增強韓國公民嘅民族自豪感，因為世宗係朝鮮王朝第4代王嘅廟號，佢對韓國有多好貢獻，好得到韓國人尊敬，係韓國第一次用人名做城市名。

亦都有韓國新行政首都建設推進委員會嘅委員話，改名做「世宗」係考慮到「世宗」發音清晰，英文譯名又簡潔。

史

2009年11月，李明博公開表示會修改原案，又同國民道歉。韓國政府響2010年1月最終決定取消原有嘅行政中心城市計劃，改為建設以教科學為中心嘅經濟城市，又話會打造科技特區、引進高科技、引進綠色產業、起大學等等。

2010年6月，《世宗市修訂案》俾韓國國會否決；2010年7月，韓國總理鄭雲燦因為噉而辭職。

不過，經過10年嘅糾纏，南韓新行政首都世宗市仍然響2012年7月正式成立，由2012年9月到2014年，將會有36個政府部門同國營機構搬入嚟，有超過10,000個公務員會響當地打工，但係總統府同一尐重要機關仍然會留喺首爾，政府一分為二，俾人話會拖慢政府嘅工作效率。

計劃設喺世宗市嘅部門

• 負責保存同歷代總統相關嘅紀錄嘅總統紀錄館會響2011年喺世宗市啟用。
• 家陣，高麗大學同韓南大學喺世宗市有建校優先權高麗大學有一幅規模達到132萬平方公尺嘅地，預計大學會響2014年落成，叫做高麗大學世宗校園，可以容納約一萬個學生。韓南大學亦都有幅地。
• 韓國科學技術院有幅地係預留興建新嘅大學院。