世貿聯合基金總會

世貿聯合基金總會（World Trade United Foundation）係一個總部設喺香港嘅親北京組織，同中共對外國政府以及海外華人施加影響力有關^[1]。

佢宣傳自己係一個致力於促進國際自由貿易嘅非營利組織，但香港嘅觀察員指出，呢個組織幾乎冇任何同貿易有關活動嘅證據，反而同中國政府同中共嘅聯繫非常明顯。好多工作人員同埋名譽主席，都喺直接領導統戰工作嘅中共政府部門，仲有喺中共黨內擔任職務^[2]。

香港有一啲親中派政治人物，例如謝偉俊同葛珮帆^[3]等，都喺呢個組織擔任一啲名譽職位。另外，喺澳洲自由黨聯邦女議員廖嬋娥被揭發同中共關係密切期間，廖嬋娥亦被揭發係呢個組織嘅榮譽主席，但廖嬋娥就話自己當初係為咗促進澳洲同香港之間嘅貿易，並且已經喺「2016年左右」辭職^[1]。