中華人民共和國鐵道部

出自維基百科,自由嘅百科全書
  呢版講嘅係以前國務院有過嘅部門。想搵家下監管中華人民共和國鐵路嘅機構,請睇國家鐵路局。想搵家下營運住中國鐵路嘅機構,請睇中國國家鐵路集團有限公司
中華人民共和國鐵道部
Ministry of Railways
中華人民共和國鐵路標誌
類型國務院部門(正部級)
簡稱中國國鐵、國鐵、鐵道部、MOR
總部駐地中華人民共和國 中華人民共和國
北京市海淀區復興路10號
設立時間1954年─1970年、1975年─2013年
行業鐵路運輸
產品服務主管中華人民共和國嘅鐵路事務
總資產4.48萬億人民幣(2012年12月)[1]
總負債2.79萬億人民幣(2012年12月)[1]
資產負債率62.2%(2012年12月)[1]
隸屬中華人民共和國國務院
屬下18間鐵路局/鐵路公司、3間專業運輸公司

 中華人民共和國鐵道部粵拼zung1 waa4 jan4 man4 gung6 wo4 gwok3 tit3 dou6 bou6 ,曾經係中國大陸鐵路事務嘅最高主管機構,係國務院嘅行政部門之一,而家裁撤咗。日本報章經常寫成中國鐵道省zung1 gwok3 tit3 dou6 saang2中国鉄道省ちゅうこくてつどうしょう)。

2013年3月14號,第十二屆全國人民代表大會第一次會議審議通過《國務院關於提請審議國務院機構改革和職能轉變方案》,呢份議案度,鐵路部門要政企分開。於是裁撤鐵道部,佢嘅行政職能劃咗畀交通運輸部屬下嘅國家鐵路局,而佢嘅企業營運職能放咗入新組建嘅中國鐵路總公司

喺重有鐵道部嘅時候,中國大陸交通嘅行政管理分屬三個機構:鐵道部管嘅係鐵路,交通運輸部管嘅係公路、航運,民航局管嘅係民用航空。而家所有嘅交通行政管理都歸曬交通運輸部。

[編輯]

鐵道部係中華人民共和國政府最早成立嘅部門之一,一開始時係叫中央人民政府鐵道部zung1 joeng1 jan4 man4 zing3 fu2 tit3 dou6 bou6,係伴隨1949年中華人民共和國成立嘅部門。而喺1949年10月1號之前,佢嘅前身係中央軍委鐵道部zung1 joeng1 gwan1 wai2 tit3 dou6 bou6,係受中國人民解放軍中央軍事委員會管轄嘅,喺1949年10月1號當日改爲中央人民政府管轄。1954年中華人民共和國國務院成立,改爲國務院管轄,稱爲中華人民共和國鐵道部。文革期間,鐵道部喺1970年到1975年時同原先嘅交通部郵電部合併成新嘅交通部(1973年7月恢復郵電部),直到1975年1月恢復獨立,一直到2013年裁撤咗[2]

自中國大陸改革開放以來,啲人對鐵道部好有意見,因爲佢政企合一,無論行政定經營都係佢,出問題想用司法制裁佢又唔得,因爲要告佢,只能去鐵道部把持嘅鐵路法院,利益集團盤據其中,權力系統中奈佢唔何,形容佢係獨立王國,於是貪腐、績效低、服務差、買票難、亂收費,人稱「鐵老大」[3][4]

鐵道部經歷過三次改革,但都無疾而終。第一次係1986年,打算搞經濟責任承包制,將行政權下放到各地鐵路局,但由於接連發生鐵路事故,時任部長丁關根被迫辭職,改革無咗後續;第二次係1999年,當時嘅部長傅志寰好支持改革,提出「網運分離」,但兩次提出方案國務院唔批,等劉志軍上任後又無咗改革;第三次係2008年,當時成立交通運輸部,啲人呼籲將鐵道部併入去,但由於各種原因阻住咗[2]

鐵道部之所以裁撤到,有幾件事促成:首先鐵路公安、檢察院、法院相繼轉型,令鐵道部無咗佢控制嘅司法系統,其次當時中國高鐵已經有規模,未來唔會有大工程,係時候整治鐵道部[3]。2011年2月,時任鐵道部長劉志軍解任,之後開除黨籍,理由係濫用職權、受賄,要對鐵路嚴重腐敗負責[5][6]。隨住佢落馬,查處咗鐵道部相關高層,打擊曬啲利益集團,於是鐵道部無得同中央就改革議題討價還價[3]。當年7月23號,喺浙江温州發生温州高鐵事故,事故當中嘅經濟貪腐問題亦入劉志軍數[7]。呢場事故發生後,公眾對鐵道部嘅不滿集中爆發,有咗輿論推動[3],於是順理成章噉裁撤咗鐵道部。

「權利部門」:貪腐溫床[編輯]

中共中央軍委之所以設鐵道部,係因爲打仗時鐵路係好緊要嘅運輸,啲兵員、武器、戰略物資係靠鐵路大量快速噉輸送。正因爲噉樣嘅軍事背景,即使移交畀中央人民政府好長一段時間,鐵道部都重係個「準軍事部門」,同軍隊有關係。比如話解放軍曾經有個兵種叫做鐵道兵中文鐵道兵,呢個兵種喺1984年時全體轉業、併入到鐵道部,軍中各師改叫鐵道部屬下嘅工程局,靠住呢支軍隊,鐵道部實力大增[2];後來1989年時呢啲鐵道兵組建爲中國鐵建中文中國鐵建。另外喺1949年中共政權嘅建立、大陸統治嘅確立當中,鐵道部有好大貢獻[8]。所以鐵道部喺權力系統當中係「鐵幕重重」,甚至係「獨立王國」[8],比如喺司法上,鐵路部門有自己嘅公檢法機關,即係「鐵路運輸法院」,呢啲法院財權、人事權都唔獨立,都係依賴喺各級鐵路局,於是呢啲法院嘅司法公正就好有問題喇,佢哋審親同鐵路有關嘅案都係要睇鐵路局嘅口面,畀人話「司法審案就係鐵路部門嘅行政審批」[9]

鐵道部除咗有「權」,重有「利」。由於鐵路嘅行政管理以及營運都係鐵道部揸住曬[10],所以鐵道部係個利益好深嘅部門,因爲鐵路係好緊要嘅運輸系統,無論客運定貨運,而中國鐵路里程排世界第二,擁有複雜嘅鐵路網,亦有龐大嘅鐵路需求。尤其係中國改革開放後,經濟騰飛,貨物、人口運輸量不斷增長,比如每年春運嘅墟冚就係證明[11]。再加之鐵道部嘅軍事背景,呢個部門嘅利益關係深到唔深。而食水最深在於近年來中國高鐵嘅發展,起高鐵係要巨額嘅財政支出,呢筆撥來嘅巨款就有好大嘅貪腐可能[12]。每年中國政府對鐵道部都有諸如貸款、債券等等嘅支持,但係鐵道部嘅負債重係好驚人,資產負債達62.2%[1],負債總額相當係中等規模國家嘅GDP[13]。而鐵路本身係個好好搵嘅項目,呢筆債鐵道部亦唔係還唔起,實質上鐵路盈利猛增添[1],噉填唔到呢個窿、啲巨款去向就值得思疑喇[12][13]

正因爲鐵道部係個「權」「利」部門,所以要喐佢就好難,比如2008年成立新嘅交通運輸部,當時有人提議鐵道部應該歸入新設部門,噉就唔使機構重複啦,不過鐵道部副部長就話,鐵路對中國好緊要,係國家戰略,留低鐵道部會有「體制優勢、資源優勢、機制優勢」,可以集中力量做大事[14]。而喺中國改革深化嘅過程中,鐵道部噉樣嘅部門可以殘存,一般認爲係有來自最高權力嘅保護[12]。1990年代以來,鐵道部一直由時任總書記江澤民嗰派嘅人馬盤據[12]。不過喺2011年原鐵道部長劉志軍因爆出貪腐而落馬之後,江派勢力大受打擊,繼任嘅盛光祖係胡錦濤嗰派嘅人,於是鐵道部內嘅江派人馬受到排擠[12]

而家鐵道部已經裁撤,政企功能分開。鐵路嘅營運、建設交畀中國鐵路總公司。而呢間公司順便孭埋爭落啲數。按照公司運作常理,孭咗筆咁大嘅數,係應該減少投資,還噉啲數先講嘢嘅,但係中國鐵路依然繼續起新鐵路,重擴大投資添,好明顯同從前噉都係由國家注錢投資[13]。因此有評論認爲,鐵道部嘅解體係表面上、形式上嘅,中國重係無開放到啲緊要嘅經濟部門,重係畀國家揸死,本該交畀市場調控嘅嘢依然國家壟斷,「國進民退」(國企入、民企出)嘅體制唔變,重係埋藏咗貪腐嘅溫床、低效嘅弊病,因爲無競爭,市場監管上咁巨無霸嘅企業靠住壟斷得來嘅規模優勢,有可能同政府部門有利益輸送[3]。呢點唔似日本國鐵解體後真係變成民營化,所以啲評論認爲呢番改革其實係失敗咗嘅,換湯唔換藥[15][16],公眾可能重係要面臨變咗形嘅「鐵老大」[3];亦有觀點認爲話曬原先政企合一嘅體制冧咗,雖然離真正嘅市場化重有排,啲作風一時間亦唔會話變就變,但無咗體制基礎,啲風氣會慢慢變好[4]

[編輯]

  1. 1.0 1.1 1.2 1.3 1.4 鐵道部2012年盈利猛增5倍 負債率居高不下. . 新華網. 2013年4月28號. 喺2015年2月1號搵到.
  2. 2.0 2.1 2.2 . BBC中文網. 2013年3月10號. 喺2015年7月19號搵到.
  3. 3.0 3.1 3.2 3.3 3.4 3.5 . 搜狐評論. 喺2015年7月19號搵到.
  4. 4.0 4.1 . 大洋網. 2013年3月11號. 原著喺2016年3月4號歸檔. 喺2015年7月19號搵到.互聯網檔案館歸檔,歸檔日期2016年3月4號,.
  5. . 新華網. 2011年2月25號. 喺2015年7月19號搵到.
  6. . 新華網. 2012年5月28號. 喺2015年7月19號搵到.
  7. 國務院「7·23」甬温綫特別重大鐵路交通事故調查組 (2011年12月25號). 7·23温綫特別重大鐵路交通事故調查報告. 國家安全生產監督管理總局. 原著喺2012年1月11號歸檔. 喺2015年7月19號搵到.
  8. 8.0 8.1 (日文). 時事通信社. 喺2015年3月2號搵到.
  9. . 北京日報. 2012年6月7號. 原著喺2013年6月2號歸檔. 喺2015年3月2號搵到.
  10. . 中華人民共和國中央人民政府. 2005年9月21號. 喺2015年3月2號搵到.
  11. (日文). 時事通信社. 喺2015年3月2號搵到.
  12. 12.0 12.1 12.2 12.3 12.4 (日文). 時事通信社. 喺2015年3月2號搵到.
  13. 13.0 13.1 13.2 (日文). 時事通信社. 喺2015年3月2號搵到.
  14. . 浙江在綫. 2008年3月12號. 喺2015年3月2號搵到.
  15. (日文). 時事通信社. 喺2015年3月2號搵到.
  16. 構改革 政企不分只玩形式會搞成四不像. 搜狐評論. 喺2015年7月19號搵到.