九二共識

九二共識係一個應用喺台海關係入面嘅術語，但係佢嘅意思人言人殊，唔同人都有唔同解釋。

歷史

1992年，中國國民黨同中國共產黨喺香港舉行「香港會談」，但係會談結束之後當時根本就冇任何共識。

1999年，當時係中華民國總統嘅李登輝提出「特殊國與國關係」嚟定義中華民國（台灣）同中華人民共和國（大陸）嘅關係。當時大陸海協會副會長唐樹備為咗反制李登輝，就話1992年嘅香港會談雙方係有咗同一個中國嘅共識。

到2000年，中華民國政權交替，陸委會主委蘇起第一次將「九二共識」同「一個中國，各自表述」掛鈎，九二共識呢一個名詞第一次出現。後來喺2006年，蘇起先至承認九二共識係佢自己老吹嘅。

2005年，國民黨嘅連戰走去訪問大陸之後，國民黨同共產黨出聲明話會一齊推動九二共識。呢次亦都會係共產黨嗰邊，第一次用到「九二共識」呢個詞。

2008年之後，國民黨嘅馬英九上台，九二共識正式確立，兩地簽訂嘅ECFA同埋之後嘅馬習會，被認為係九二共識入面最大嘅成功。

意思

由於九二共識出現嘅過程有爭議，兩岸唔同嘅人對於「九二共識」嘅理解都有好大落差：

中國國民黨主流認為九二共識係：「一個中國，各自表述」，台灣同大陸都喺一個中國入面，不過台灣承認嘅係中華民國，大陸承認嘅係中華人民共和國。

民主進步黨、台灣團結聯盟等等嘅泛綠政黨就話所謂嘅「九二共識」根本係假嘅，冇出現過。1992年只係出現過會談，但係冇共識。

中國共產黨就話九二共識係：「堅持一中原則，謀求國家統一」。相比國民黨嘅理解，共產黨嘅演繹對九二共識更加嚴格。同時又話「根據台灣加入嘅國際組織嘅性質，要以中華人民共和國政府可以接受嘅方式作出安排」，即係台灣參與國際組織嘅生殺大權會由中國共產黨控制。2019年1月2日，中共中央總書記習近平公開表明九二共識同兩岸統一之間嘅關係，提出「習五點」。