互射十二碼
互射十二碼係喺足球賽用嚟決勝負嘅一種方式。
喺一般淘汰賽入面，如果喺法定時間完場、加時上下半場共30分鐘都分唔出勝負，就會以互射十二碼嘅方式決勝負，雙方各派出五人梅花間竹噉輪住嚟射。頭五輪就以入波多啲嗰隊贏，如果打完頭五輪都分唔到勝負，就會進入突然死亡階段，到時任何一方射入而另一方射失，場波就會完。互射十二碼勝方就會贏咗成場比賽。
ABBA制
[編輯]ABBA制係參考網球決勝局嘅發球順序，即係當A隊射完第1球之後，B隊會連續射第2、第3球，然後再到A隊射第4、第5球，如此類推，去到突然死亡都繼續係噉。
根據研究顯示傳統嘅互射十二碼形式先主射嗰一隊有六成機會勝出，有啲唔公平，所以歐洲足協參考網球決勝局嘅發球次序，推出「ABBA」主射形式，希望令到互射十二碼變得更加公平[1]。
經過兩年試驗之後，已經證實呢種方式唔係特別受歡迎，主要係因為程序過於複雜，而足球本身係一項簡單同傳統嘅比賽，所以國際足球協會喺2019年已經決定唔會再用ABBA制。