紅毛猩猩

  「人猿」跳轉到呢度。想搵廣義嘅人猿，請睇「猿」。

How to read a taxobox 紅毛猩猩
瀕危指標
瀕危 (EN)
物種分類
界 動物界 Animalia 門 脊索動物門 Chordata 綱 哺乳綱 Mammalia 目 靈長目 Primates 科 人科 Hominidae 亞科 猩猩亞科 Ponginae Elliot，1912年 屬 猩猩屬 Pongo Lacépède, 1799
Type Species
Simia pygmaeus Linnaeus，1760年
紅毛猩猩嘅分佈
種
婆羅洲猩猩 Pongo pygmaeus 蘇門答臘猩猩 Pongo abelii

紅毛猩猩，又叫人猿，屬於靈長類，係世界上最大嘅住喺樹度嘅動物，亦係靈長目中第 2 最大嘅猩猩。佢同馬騮最大分別係猩猩無尾，可以用手或腳攞嘢食。同人類好相近，同人類基因相似度達96.4%。通常唔用聲音溝通，通常有好幾個個體會喺同一個區域活動，但係佢哋唔會理對方。平均有 40 年命。

分佈

有兩個亞種：分布喺馬來西亞同印尼嘅婆羅洲；以及印尼嘅蘇門答臘。主要住響嗰帶獨有嘅泥炭沼森林裏面。

食物同埋生態地位

紅毛猩猩食果實、花、樹葉同埋樹皮。部分紅毛猩猩亦都食昆蟲、雀蛋，甚至有捕食懶猴咁上下大細嘅動物嘅記錄。係泥炭沼森林嘅重要植物播種者。老虎同人類係猩猩嘅主要敵人。

數量

紅毛猩猩係以生少啲，養耐啲作為生育策略。佢哋嘅懷孕期大概 233 - 263 日，大概要六到七歲左右先識獨立生活。通常係猩猩乸負責照顧後代，公猩猩大多獨立行動。因為生育期咁長，整體嘅生育率顯得好低，再加上棲息地俾人破壞、獵人捉，好多人猿面臨瀕臨絕種嘅危險。紅毛猩猩數量喺過去 100 年明顯減少咗九成，現今生存喺婆羅洲嘅紅毛猩猩已剩番大概 55,000 隻左右。

保育現狀

化石證據顯示，馬來西亞人好耐以前就捉細隻嘅紅毛猩猩，當寵物咁養（直到而家都係）。而第一個從原生地引入飼養紅毛猩猩嘅人，係荷蘭一個皇室成員（奧榮治王儲，Prince of Orange），佢響1776年將一隻紅毛猩猩乸引入佢嘅私營動物園裏面。另外亦有記錄證實法國同英國倫敦先後喺1789年同1818年將紅毛猩猩引入到唔同嘅私營動物園同屋邨。而最多紅毛猩猩運去動物園嘅時間係1927年，根據紀錄有25隻（包括6對猩猩連幼仔），係一個德國動物收藏家經船路運過嚟嘅。到2000為止，大概有886隻紅毛猩猩被分別運送到213個動物園或私人收藏，當中有386隻婆羅洲猩猩、305隻蘇門答臘猩猩、179隻混種猩猩同16隻未能分辨嘅品種。

紅毛猩猩嘅復育工作基本上係失敗嘅：動物園一般將兩種紅毛猩猩困埋一齊繁殖，結果繁殖出嚟嘅紅毛猩猩佔三分之二都係佢哋嘅亞種；另外就係喺放生之前，並冇為紅毛猩猩進行求生訓練。由1975年開始，野生動物巡查員陸續將300至500隻紅毛猩猩放返兩個原產地，佢哋都係由寵物交易商救番出嚟嘅，但最後佢哋因為唔識搵食，唔識避開捕食者，唔肯爬上樹，亦冇檢查佢哋有冇病等等，結果佢哋全部死晒。

而香港，現時香港動植物公園養咗紅毛猩猩，係屬於婆羅洲種，佢哋所住嘅籠係喺1978年起嘅。2010年，康文署從匈牙利一間動物園引入一隻猩猩公「Vandu」，作為繁殖同教育用途。香港濕地公園裏面亦有紅毛猩猩嘅模型，就喺展覽館嘅「濕地世界」裏面。

參考

• 香港動植物公園婆羅洲猩猩介紹
• 蘋果日報-「動植物園添大猩猩」,2010年1月28日

睇埋

• 婆羅洲哺乳動物