仿翅，又叫素翅、假翅、環保翅，係魚翅嘅仿製品，通常用明膠或蒟蒻整。如果用明膠整，有動物皮成份，就唔算係素食。
雖然仿翅嘅口感同鮮味都比唔上真魚翅，不過比較耐火，就算煮好耐都唔會溶。
用仿翅取代真魚翅嘅原因，多數係成本嘅考慮，因為仿翅嘅製作成本比採集真魚翅低好多。另一個原因係基於保育嘅原因，減少殺害鯊魚。
