魚翅

天九翅

魚翅湯

魚翅係中國傳統嘅名貴食材之一，喺《宋會要》度記載，係山珍海味中嘅一種，「鮑參翅肚」中嘅「翅」所指嘅正係魚翅。魚翅用鯊魚嘅鰭製成，通常同雞湯等煮成魚翅羹。

有講法話中國人食用魚翅嘅習慣源於鄭和，《明宮史》記載，明熹宗鍾意用魚翅、燕窩、蛤蜊整嘅「一品窩」，《本草綱目》載「（鮫魚）背上有鬣，腹下有翅，味並肥美，南人珍之」。香港係目前全球最大嘅魚翅轉口站同銷售點，港人食魚翅嘅風氣大概喺19世紀中開始。

魚翅本身無特別嘅味道，煮好後形成透明嘅絲狀。香港亦有人用粉絲、豬肉絲、木耳絲扮魚翅羹嘅街頭平價小食「碗仔翅」。日本亦有生產人造魚翅（素翅）。

生態破壞

反對食魚翅嘅人講，因為魚翅價錢貴，吸引各地漁民捉鯊魚。而鯊魚肉唔值錢，漁民喺捉到鯊魚之後，淨係割咗魚鰭，就將條魚抛返落海，留翻多尐空位放價高嘅魚翅。啲鯊魚唔會即刻死，但會因游唔到水而窒息，或者俾其他鯊魚食。部份關注動物同生態團體近年落力宣傳唔食魚翅，原因唔止係攞魚鰭嘅過程殘忍，更會搞到鯊魚數量大減；三十年嚟跌咗九成。大量捕殺海洋生態系統金字塔頂部嘅鯊魚，重會搞到大量中小型魚類因為冇咗天敵而數量大增，搞亂成個海洋生態平衡。

家陣魚翅主要嚟自未瀕危嘅藍鯊同青鯊，但現時捕鯊地區未有對瀕危品種立法禁捕，所以對瀕危品種嘅生存經已受到嚴重威脅。專家話中國經濟好，魚翅需求大增，所以對鯊魚整體生存構成更大嘅威脅。

文化異相

曾幾何時，鯊魚喺西方社會受到大量捕殺，攞咗魚油嘅成分，魚翅就掉咗。但係美國加州唔准食魚翅。

澳門有唔少餐廳用魚翅來做招徠，平到幾十文都有交易，連政府都有幫手宣傳當地嘅魚翅飲食文化。

俗話

魚翅向來唔平，通常會配其他貴嘅材料來煮同食。字面意思唔多妥嘅「魚翅𠺘口」同「魚翅撈飯」，比喻「有米兼亂揈錢」。

出面網頁

• 姚明帶領上海男籃拒吃魚翅