魚翅
呢篇文講食材。想搵湯羹嘅話，請睇魚翅羹。 「翅」跳轉到呢度。想搵國語意思，請睇「翼」。
魚翅係中國傳統嘅名貴食材之一，喺《宋會要》度記載，係山珍海味中嘅一種，「鮑參翅肚」中嘅「翅」所指嘅正係魚翅。魚翅用鯊魚嘅鰭製成，通常同雞湯等煮成魚翅羹。
有講法話中國人食用魚翅嘅習慣源於鄭和，《明宮史》記載，明熹宗鍾意用魚翅、燕窩、蛤蜊整嘅「一品窩」，《本草綱目》載「（鮫魚）背上有鬣，腹下有翅，味並肥美，南人珍之」。香港係目前全球最大嘅魚翅轉口站同銷售點，港人食魚翅嘅風氣大概喺19世紀中開始。
魚翅本身無特別嘅味道，煮好後形成透明嘅絲狀。香港亦有人用粉絲、豬肉絲、木耳絲扮魚翅羹嘅街頭平價小食「碗仔翅」。日本亦有生產人造魚翅（素翅）。
統計
[編輯]1980年代打後，隨住中國經濟繁榮同啲人有錢咗，全球魚翅交易量大升。1987年全世界魚翅交易總量係4907噸，10年後升到13614噸。大概50至80%嘅魚翅經香港中轉，大部分流入中國大陸，少部分賣去馬來西亞、台灣、印尼同泰國。
2012年，山東一間魚翅公司嘅老細劉先生話畀《中國經濟周刊》知，北京可能係中國國內最大嘅市場，每日乾魚翅消費量大概係5000市斤，浸開相當於1.5至2萬市斤魚翅食材。按每日消費1.5萬市斤魚翅、每碗魚翅湯含30克魚翅、每碗售價當係400蚊來粗略估算，北京地區每日魚翅銷售額係1億，每年365億。劉先生話，食得起魚翅嘅多數係有錢生意人、官員同娛樂明星，「佢哋就係定位喺1%嘅人群，消費得起佢哋呢個產品」。山西太原豪門吉品餐飲集團曾公開表示，佢哋魚翅產品年營業額有成5000萬人民幣。[1]
生態破壞
[編輯]反對食魚翅嘅人講，因為魚翅價錢貴，吸引各地漁民捉鯊魚。而鯊魚肉唔值錢，漁民喺捉到鯊魚之後，淨係割咗魚鰭，就將條魚抛返落海，留翻多尐空位放價高嘅魚翅。啲鯊魚唔會即刻死，但會因游唔到水而窒息，或者俾其他鯊魚食。部份關注動物同生態團體近年落力宣傳唔食魚翅，原因唔止係攞魚鰭嘅過程殘忍，更會搞到鯊魚數量大減；三十年嚟跌咗九成[2]。大量捕殺海洋生態系統金字塔頂部嘅鯊魚，重會搞到大量中小型魚類因為冇咗天敵而數量大增，搞亂成個海洋生態平衡[3]。
家陣魚翅主要嚟自未瀕危嘅藍鯊同青鯊，但現時捕鯊地區未有對瀕危品種立法禁捕，所以對瀕危品種嘅生存經已受到嚴重威脅。專家話中國經濟好，魚翅需求大增，所以對鯊魚整體生存構成更大嘅威脅[4]。
文化異相
[編輯]曾幾何時，鯊魚喺西方社會受到大量捕殺，攞咗魚油嘅成分，魚翅就掉咗[未記出處或冇根據]。但係美國加州唔准食魚翅[5]。
澳門有唔少餐廳用魚翅來做招徠，平到幾十文都有交易，連政府都有幫手宣傳當地嘅魚翅飲食文化。
俗話
[編輯]魚翅向來唔平，通常會配其他貴嘅材料來煮同食。字面意思唔多妥嘅「魚翅𠺘口」同「魚翅撈飯」，比喻「有米兼亂揈錢」。
菜式
[編輯]參考
[編輯]- ↑ 〈北京鱼翅消费被曝1天1个亿 一碗价格达到1800元_新闻台_中国网络电视台〉。news.cntv.cn。喺2023-04-13搵到。
- ↑ Laura Marquez (2006-10-30). "Rising Demand For Fins Contributes To Decline In Shark Population, Critics Charge". ABC News. 原著喺2007-11-02歸檔. 喺2008-06-21搵到.
- ↑ 〈存档副本〉。原著喺2007年12月29號歸檔。喺2012年10月29號搵到。
- ↑ 〈《海鮮的美味輓歌》：中國人對全世界的水中生物而言，可說是個噩耗〉。The News Lens。2018-07-09。
- ↑ 〈美國加州禁魚翅法案爭論激烈 華人熱議〉。《大紀元時報（美國）》。2011-05-08。
