碗仔翅

出自維基百科,自由嘅百科全書
跳去: 定向搵嘢
碗仔翅

碗仔翅係一款香港街頭常見嘅仿魚翅,材料以粉絲為主,以澱粉將湯煮到濃稠,並加入老抽同生抽整到變啡色,配以麻油浙醋、白胡椒粉、辣椒油等。

歷史[編輯]

碗仔翅本身冇魚翅成份,但佢睇落同上湯魚翅相似,並用細碗嚟裝,所以叫做「碗仔翅」。大概喺1960年代開始,香港街頭湧現一批小販專門賣呢類平民仿翅,同生菜鯪魚肉湯一齊賣,鯪魚肉以魚肉混入澱粉打成魚肉漿,再以類似刀削麵嘅手法削入湯度煮成長條狀嘅魚肉條,唔少人賣碗仔翅嘅時候,鍾意加埋魚肉一齊食。有啲小販亦會賣碗仔翅撈通心粉,增加飽肚感,但噉嘅食法近年已經好少見。

喺香港,由於街頭碗仔翅通常加入大量味精,湯底只係由清水、豉油味精澱粉溝埋,雖然碗仔翅仍然大受歡迎,但多數人都覺得係垃圾嘢食,以前好少人會喺屋企煮呢啲嘢嚟食。但隨住香港生活質素提高,呢種昔日難登大雅之堂嘅街頭食品,大概1990年代之後亦喺香港一啲酒樓有得賣。除咗肉絲份量增加,亦會加入冬菇絲、蛋花、甚至金華火腿、豬皮、魚肚。

做法[編輯]

  • 上湯或清水-1公升
  • 雞蛋-1隻
  • 粉絲-30克浸軟、切段
  • 冬菇-幾片約20克浸軟、去蒂、切絲
  • 雞胸肉-100克

先將雞胸蒸熟,用手將肉撕開;將上湯煮滾,加入肉絲、粉絲、冬菇、雞蛋,最後加老抽、澱粉、油攪勻。食嗰陣加入淅醋、麻油、白胡椒粉、辣椒油等。

睇埋[編輯]