何曉輝

何曉輝，香港資深醫生，多年來任職伊利沙伯醫院，又做過急症科醫學院院長，曾經就一啲香港重大事件向公眾解釋醫院有關工作。

獲得獎項

喺2018年，佢獲頒申訴專員嘉許獎公職人員獎。另外喺2018年，佢獲頒大紫荊勳章。

醫護工作記事

佢喺伊利沙伯醫院算係管理層，除咗醫院以內嘅工作之外，亦曾經喺2012年同香港海關分享醫學上點樣處理體內藏毒疑犯，又曾經支持2016年樂施毅行者活動。

1996年嘉利大廈大火事件

1996年嘉利大廈大火事件嘅時候，好多傷者都送咗去伊利沙伯醫院，而佢當時係伊利沙伯醫院嘅急症顧問醫生，曾經向解釋點樣做好災難救援應變。

2022年武漢肺炎香港第5波疫情

2022年武漢肺炎香港第5波疫情，令公立醫院急症室同殮房爆滿，有長者懷疑因為等唔到上病房，就死咗喺急症室，連遺體都滯留，要急建冷氣貨櫃停屍。

伊利沙伯醫院喺3月9號改為專門接收武漢肺炎病人，同日下午伊院舉行員工座談會解釋安排，何曉輝喺發言嘅時候落淚，一度哭不成聲，又提到好多醫護捱得好辛苦，要當場其他人安慰。事後，有其他醫護向記者講到，佢好有經驗，做過嘉利大火都喊到咁，可想而知佢壓力有幾大。

政治立場

佢係親中派，曾經同埋盧寵茂、謝德富、唐國隆、周伯展、李繼堯等著名醫學界人士聯署反佔中，當中聯署內容形容爭取民主嘅佔領者係癌症，又支持警察執法。基於佢嘅立場，去到2022年佢因為武漢肺炎疫情落淚嘅事被廣泛報道嗰陣，有一啲連登網民反而對何曉輝揶揄。