余彭年

余彭年（英文：Yu Pang-lin，1922年 11月21號—2015年 5月2號），別名彭立珊，係湖南省漣源市藍田鎮中人士，深圳彭年酒店創辦人，中國慈善家，連續3年位列「胡潤慈善榜」「首善」桂冠，2008年累積捐款超過30億人民幣。

余彭年自幼家貧，做過記者，23歲去咗上海打工。中共建國後第5年，1953年俾人誣告係「逃亡地主」，坐咗3年監。1958年由上海經澳門屈蛇走嚟香港打工，之後做老細，搞房地產建築、酒店業、時鐘酒店等。嚮1980年代中國改革開放，余彭年返深圳投資起彭年酒店、彭年廣場等。

行善哲學

余彭年寫咗篇文《我的感言》認為：「子強於我，留錢幹麼？子弱於我，留錢幹麼？」，留錢畀後人會害咗佢哋。所以遺產不留後代，全部撥做公益慈善。余彭年有兩個仔同埋孫仔，都只係做彭年集團嘅職員。

余彭年行善必定親力親為，因為1982年佢捐畀家鄉嘅醫療儀器、醫療中心，救護車俾人改裝成地方領導嘅私家車，余彭年覺得好心痛。

因此佢自資成立彭年光明行動，保證所有捐贈嘅錢都可以直接做好事。白內障患者嘅一切交通費、住宿費、醫療費都係由余先生畀。