俾斯麥號戰列艦

俾斯麥號戰列艦

俾斯麥號戰列艦嘅三維立體影像

俾斯麥號（德文：Bismarck）係一艘喺第二次世界大戰中聞名於世嘅德國戰列艦，以德意志帝國第一任丞相奧托·馮·俾斯麥命名。俾斯麥號係俾斯麥級戰列艦嘅一號艦，喺1936年動工，1940年8月服役。滿載嘅時候排水量達到49972噸，係嗰陣時德國最大戰艦，佢嘅排名直到1941年先俾排水量超過71829噸嘅日本大和號戰列艦超越。俾斯麥號係嗰時納粹德國海軍嘅象徵，戰船武器精良、防護完善。

1941年5月19號朝早，俾斯麥號同愛根親王號重巡洋艦秘密離開波蘭格丁尼亞港口，準備突破英國皇家海軍嘅海上封鎖，進而殺入大西洋截擊補給英國本土嘅大西洋船隊。但係兩部戰艦喺途徑挪威伯根嘅時候被瑞典艦隊同英國偵察機發現徂，英國隨即調集胡德號同威爾斯親王號兩部頂級戰艦出擊攔截。5月24號朝頭早，英德兩國軍艦喺丹麥海峽爆發激戰，俾斯麥號淨係用徂十幾分鐘就打沉徂胡德號，重創英軍士氣。時任英國首相丘吉爾親自下令：「炸沉俾斯麥號！」

雖然俾斯麥號重創英國艦隊，但係自己都被英軍擊中徂燃料艙。於是艦長決定將俾斯麥號先開去法國搶修，但係途中被英軍其他船隻同水上飛機追蹤到。5月26號，英軍皇家方舟號航空母艦嘅劍魚式魚雷轟炸機用魚雷擊中徂俾斯麥號嘅舵。到徂5月27號，英軍戰艦終於完全包圍徂俾斯麥號，經過接近兩個鐘頭嘅炮轟之後，俾斯麥號嘅上層建築幾乎被英軍夷為平地，但係硬係唔沉。最後俾斯麥號嘅船員明白到已經去唔到法國，於是自己炸沉徂部戰艦。