債務通縮

債務通縮 （英文：debt deflation）係一個經濟理論，呢個理論嚟自著名美國經濟學家費沙（Irving Fisher）喺1933提出嘅關於債務泡沫爆破嘅描述。根據呢個理論，經濟衰退（recessions）同埋經濟蕭條（depressions）係因為通貨緊縮引致整體債務嘅實際水平上升咗，升到啲人還唔起錢，被迫拖欠消費貸款同埋按揭貸款。由於債仔違約，加上抵押品嘅市價下跌，債仔即使違約亦都可能成為負資產，結果銀行嘅資產縮水，銀行破產嘅風險上升。

因為銀行有大量資不抵債嘅貸款，銀行嘅資產縮水，出現「資產負債表收縮」問題，為咗符合《巴塞爾協定三》同埋監管機構嘅資本充足比率嘅要求，銀行被迫收縮貸款。銀行減少貸款咗，導致社會嘅整體支出亦都減少咗，經濟就會下行，而經濟下行又會進一步冷卻經濟，咁樣循環落去，就會出現經濟衰退。

呢個理論係由經濟學大師費沙（Irving Fisher）喺1929年華爾街股災同埋之後嘅經濟大蕭條之後發展出嚟嘅。 喺費沙討論債務通縮理論之前，凱恩斯（John Maynard Keynes）對債務通縮嘅理論研究亦都相當之多，凱恩斯叫呢啲理論做流動性陷阱（liquidity trap），但係同佢後嚟嘅流動性偏好理論（liquidity preference）同埋貨幣需求理論（demand for money）比較，佢當時認為債務通縮理論係有缺陷嘅。

但係喺1980年代起，無論係主流經濟學（Mainstream economics），定係非主流經濟學（Heterodox economics）嘅後凱恩斯（post-Keynesian economics）學派，都重新對債務通縮理論發生咗興趣。 債務通縮理論之後俾明斯基（Hyman Philip Minsky）等嘅後凱恩斯學派經濟學家同埋新古典主流經濟學家（neo-classical mainstream economist）嘅聯儲局主席伯南克（Ben Bernanke）進一步發展同埋完善。